CorseCurteOtubar#11 – Voi di gnotul

#11 – Voi di gnotul

Soi bessole.
Soi piçule, une vore piçule. Di glace la piel. Di venc lis gjambis.
Voi di cinise a berlin:
«Tu valis nuie. Tu sês nuie. Va vie. Va vie».
Vôs di panze a revochin: «Tu valis nuie».

Mi plei.
Claps, come curtìs a ponte, mi sgranin i zenoi. O berli, mute di suns. O soi piere cul cûr in gole. Mi scjafoi.

Berghelaments, simpri plui fuarts e rabiôs e dongje, son tambûrs che a craçolein.

Musis di pôre mi sparnicin ledan.
O soi ledan.
La puce mi sbuse la anime.
Mi bandoni. Trimi sudôr. O spalanchi lis pipinis.
O soi, striçade, in te muardude dal terôr.

«Noooo, chei voi, no. Noooo!».
Vegnin indevant, viers di me: cence remission.
Il bec a curtìs mi spopee. Mi sbrendule.
E la vôs, di oltri tombe: «Trop timp metitu par no sbati lis palpieris

Nêf nere mi cuvierç. Forsit, e à pietât di me.

«Tu scugnis murî, tu scugnis mu rî, tu scu gnis mu rì» e berle la lune.
O soi cadavar di celuloide.
O stagn intune poce di rubin, induride.

O jeri frute. O soi orôr.
Il pugnâl di voi licuits mi supe la ultime energie.

Cui dincj di cjarvon, un gnotul sonambul al glot il sugo.
Carbons intor di me.
Cidinôr rumorôs.

Soi bessole.
Bessole.

di ***
#1***

1 coments On CorseCurteOtubar#11 – Voi di gnotul

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît