CorseCurteOtubar#09 – Luncs minûts

#09 – Minûts luncs

E je une clamade ducj i dîs, tor undis, e o spietin cun ingôs fin che e rispuint. Daspò a man a man che il dialic si disglagne plui o mancul normalmentri e torne la calme. Cualchi volte al covente di ricuardâi la date, o il di de setemane. Altris di ripeti ce che si veve contât îr. Ma si viôt che e va indevant.
La pandemie i à sdrumât lis normis semplicis e cuotidianis. Lis compris, che a jerin la sô sielte framieç da lis scansiis percorudis cun familiaritât a àn tacât a jessi nome robis che e incargave a altris. Da etichetis di formis e colôrs cognossudis e veve passât a dovê doprâ nons che e ricuardave ogni volte mancul. Puartâ i riciclabii, la sô scuse par fâ une cjaminade a buinore, e jere cumò une tasse di butilis e cjartis fin che cualchidun da la famee al passave a puartâle vie.
Finît l’isolament, pôc par volte le vin convinçude di ricjapâ i siei cefâs e tignî dûr. Une domenie i fradis si son metûts di acuardi par puartâle a cjase nestre a buinore par che nus judàs cuntun rost di cunin, che no si veve tornât a fâ in vincj agns, di cuant che il pari al jere muart.
Prime e cencenave, ma cuant che e ò viodût che la nestre ignorance e jere vere e à cjapât il baston di cjapitani e e à tacât cun lis indicazions: “No stait a jessi sudizionôs cun l’ai”. Vot dincj scussâts e intîrs”. “I tocs si metin tal vueli frêt, fin che a si indorin, no si zonte nissun licuit”. “Non stait a dismenteâ i tocuts di panzete” “I ramaçuts di osmarin a van intîrs e in cuantitât”. “Cumò si, sumìn il vin blanc”.
La sô concentrazion e jere stade otime, la voie ancje. Il savôr e i aromis, compagns a chei che o ricuardavin di piçui.
Di li a une setemane il telefon al veve sunave dibant.Il portîr dal edifici nol rispuindeve al nestri messaç tal whatsapp. O ricuardi che o vevi provât a telefonâ a intervai di dîs minûts.
Finalmentri, al è rivât il “pronto”.
“O soi stade dal piruchîr. Mi coventave incolorî i cjavei. A jerin un mismàs”.
Cualchi dì al sarà, o ricuardi di veêmi dit, ma nol è chest.

di ***
#1***