CorseCurteOtubar#07 – Il gno amì

#07 – Il gno amì

O ai un amì che ogni tant al ven a bevi un tai cun me, e cuant che al è in vene di confidencis, magari dopo il tierç taiut, al tache a contâmi des sôs pôris di une volte e di come che cul timp al è rivât a superâlis. E o scugni ancje ameti che rispiet a come che lu cognossevi di frut, lui al è verementri cambiât, par fuarce in miôr.
Sì che duncje, za di zovin lui al veve pôre di dut, a scomençâ dal scûr, di jessi rifiutât di chei altris, pôre di sbaliâ. In pôcjs peraulis: pôre di vivi. Il fat al è che in famee lui al jere il tierç fi plui piçul e alore al jere simpri l’ultin in dut, cjolt simpri in zîr di chei altris fradis, e tignût a nuie dal pari, che ju tignive simpri come esemplis inte vite. Une strade, la sô, simpri di rive sù. E di li a son scomençadis lis sôs pôris, puartadis indenant tai agns fin cuant che al à cognossût Paolute. Jê e studiave psicologjie a Vignesie e alore si viodevin in treno biel che a lavin a la Cà Foscari.
E cussì a plancut e je cambiade ancje la sô vite, tant al è vêr che le à ancje sposade. Lui mi conte che no dovìn lassâ che lis nestris pôris nus impedissin di cori daûr ai nestris siums, e che la pôre no je realtât, no son fats, e che la reson de pôre e nas di ce che nol è cognossût.
Cuant che si à pôre di dut al è parcè che nus mancje la voie di vivi.
Lui si à tirât fûr cul volê riscjâ un gnûf mût di vivi la vite. Al à vût il coragjo di cjalâ la sô pôre tai voi e cussì  al à vuadagnât fuarce. Cumò lui al è pront a lâ viers il mont cul dirit di fânt part ative. La sô vite e je fate di piçui moments, e lui al vûl viviu un a la volte e a gjoldisi la plenece di ognidun; cussì nol è plui puest pe nissune pôre.
Al à finît il so discors cul dîmi: – Cumò o vuelarès sberlâ al mont intîr: no stait a vê pôre!
Beât lui che al à fat cussì tante strade interiôr: sarà il câs di cjatâsi plui spes parcè che o ai tant cuissà cetant di imparâ!

di ***
#1***

1 coments On CorseCurteOtubar#07 – Il gno amì

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît