CorseCurteOtubar#06 – La compagnie

#06 La compagnie

Il cjapitani Smith, cu la compagnie scanade, nol varès mai pensât a un altri atac nemì. Tu netavis vie cent cuntune bombe e a rivavin mil, tacant cence pôre, cun vecjos lancerochets e kalashnikov, montant bicicletis e motorins. Intrepits, inscuelâts fin di fruts inte fe tal unic diu e determinâts a parâ vie i forescj.
L’avampost di Feyzabad nol jere l’unic a scugnî sopuartâ l’atac taliban di primevere.
Platâts tes busis e protets dai sacs di savalon, i soldats inglês a spietavin une altre cjarie dal nemì.
Al sarès stât un zûc di fruts disterminâju ancje chê volte:
dal spazi un satelit al varès segnalât il moviment sul tablet dal cjapitani; piçui puntins che si spostavin sul display a mostravin vuerilîrs in svicinament.
Cence nancje spietâ di vêju incuadrâts a viste, Smith al ordenà di tirâ une bombe; il mortâr al sdrondenà, trement. E dopo, il cidinôr.
Il coragjôs cjapitani al le lui stes a controlâ i efiets dal sclop. Passât un grum di pieris i si parà devant un spetacul barbar: cjâfs cence cuarp, mans, dêts, gjambis, munçuis di cjar brusade: la brute realtât de vuere.
Ma i talibans a vevin la piel clare e uniformis inglesis!
Smith si sgrisulà: la bombe e veve colpît il nemì sbalgjât. Si tratave di un ploton dai ROYAL FUSILIERS vignût li come rinfuarç.
Strani che l’H.Q. nol ves visât. Dai cuarps si viodeve che a jerin stâts cirche trente cun doi lutignints. Un al jere inmò vîf ma in agonie.
Smith i le dongje. Il lutignint nol fevelave inglês ma une lenghe a ûs il Farsi. Al trabascjâ dôs frasis prime di murî.
Ma dopo al capità alc.
I cadavars a derin segn di vite. Di no crodi ma a tacarin a vignî sù in sinton, a cjaminâ su lis mans chei cence gjambis e su lis gjambis chei cence cjâfs. A lerin bande di Smith e de sô compagnie.
Zombies, afamâts di cjar umane! Cussì a jerin deventâts!
E alore Smith e i soi camaradis a scjamparin plens di terôr ma, par cui sa cuâl striament, plui a corevin e plui il nemì sorenaturâl ur rivave dongje.
No si saressin salvâts.

di ***
#1***

1 coments On CorseCurteOtubar#06 – La compagnie

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît