#10 – Passaris e palissis
E jere une cjase dome di feminis, mari e trê fantatis di maridâ. Une dì, si viodè picjât sul puarton de cjase un floc celestin. Aurore, une des fantatis e veve dât a lûs, no mancjarin i coments de int dal borc: «Po, ma cjale ca, cuant, cemût, cui saraial il pari, forsit cualchi soldat?»
Dutis chestis suposizions a restarin simpri tal ambit des ipotesis.
Ma la solite briade di zovenots, che a vevin nasât il pevar, si ocuparin di spampanâ l’event fasint ae zovine une serenade cun cheste cuartine: «Daspò di nûf mês le nassût un biel frutin, di scure carnision lu clamarin Agnulin». A chestis vivarosis sbefis, no si è mai viert nissun barcon par ringraciâ, al contrari, si distudavin di bot ducj i lusôrs.
Agnulin, cul cressi, si sintive comut dome dentri cjase sfueant gjornaluts par piçui, difûr dut i jere ostîl, la int lu cjalave di stos, a scuele i compagns lu tumiavin ben e no mâl, ancje pal fat che il frut nol partecipave aes lôr baronadis, come cuant che a levin te braide dal Cormôr a colocâ palissis, za che li al jere simpri un vie vai di passaris becuçant ca e là.
Agnulin i scrivè une letarute a Sante Luzie, disintji che nol voleve plui gjornaluts par piçui, ma ben si des palissis, al voleve fâsi amì dai siei compagns di scuele, partecipant aes lôr escursions, cussì no lu varessin coionât plui.
Tornant te braide dal Cormôr, Agnulin, che nol rivave a impirâ il grignel di blave te palisse, lis regalà dutis e al le a sentâsi dacîs di une staipe, di li al rivave a viodi un cuiet e neveât senari cjanôr.
Ma dulà jerino lâts i siei compagns?
Di bot il cidinôr di chel mont si jemplà di une svintule di scats, i argagns si sieravin fasint un maçalizi su chei grumuts di plumis cinisinis, che finalmentri a cjalavin la grise e frede zornade cuntun grignel di blave in bocje. Al someave un cjamp di bataie une volte finidis lis ostilitâts.
Agnulin al voleve scjampâ, al voleve dome tornà a cjase sô cui siei gjornaluts pai piçui.
di Galliano di Buenos Aires
#1368
