Ospirts

La ispirazion, clare, le veve robade a Wilde.
E il non i jere rivât dal intîf che ogni tant al salte fûr des falopis. Ospits… Spirts… Furlane e gjeniâl!
E i prins timps e funzionave a sbreghebalon!
Trops di clients ferbints e seneôs di durmî intun hotel gravit di fantasimis, spierdût inte campagne dal Friûl di Mieç, paiant cifris in tierce di zeros. E biel che dulintor nol jere nuie di fâ; a mancul di no contâ tant che turisim la puce di buiacis e i mussons grues come une ongule. Ma la atrative e jere durmî li, passâ la gnot in chês cjamaris.
Vôs, rumôrs, presincis… Mi mighe la solite menade vedo non ti vedo! A jerin spirts cun non, cognon e date di muart. Cui intune des vueris, cui di incident, cui di un colp o di cancar. A jerin ducj li, presonîrs no si sa parcè, e ducj a sossedavin e starnudavin, a rutavin e pedeavin, a vevin il lôr caratar e il lôr fastidis. Ma a restavin spirts… sigure. No podevin molâti un pugn o spostâ un imprest. No sin mighe intun film. Ma un «DÎS PO!» ben poiât adalt des scjalis al veve cuasi mandât al Creatôr un avocat di New York e i laments H24, che no lassavin durmî nissun, a vevin bielzà fat plovi denunziis e rimbors.
«A varessis di vê plui creance! Disgraciât!» ur vose Dree, daspò di vê inclaudât un Chiuso per ferie, cence savê se mai chel ambient al tornarà a vierzi.
Sierâ il mês di Avost… di no crodi, al pense. E pûr, nol sa ce altri fâ.
Ciso i mostre trop fracassade che al à la muse par vie di une granade, Lise i conte de chemio, Mariute i fâs viodi cemût che e je colade dal sest plan… E si lamentin, a berghelin. O pûr a àn voie di pandi la lôr idee su dut. Vigji le à cui zingars, Virgjinie cu la vacine, Sandri cui neris, Pieri cui politics, Lise cuintri i Poteri Forti… In pratiche une sgnape di Social Media. Ae fin al è Gjino, copât di un om zelôs cuntun colp di sclope tai budiei, chel che al romp di mancul: al blesteme e vonde, ancje se di continuo.
«Parcè no rivaiso a capî che Ospirts al è dute la mê vite? Parcè?!»
La vôs si spache in lagrimis e al è come un Vaiont. Dree al salte par aiar. Si sbroche. La rate dal mutui, i usurârs, la femine che lu à molât, i dipendents no paiâts, la vite di mierde che al fâs… Ur conte dut. Ae fin si cjate vueit, e dome li si inacuarç dal cidinôr.
Si nete vie lis ultimis lagrimis e si volte.
A son ducj li, incantesemâts, a jemplâ i scjalins. I àn dât scolte. Lu capìs dai voi plens di comprension, de empatie che i rive a revocs. Sgrisui di glace che lu travanin fin tai vues, rigjenerantlu. «Graciis», al sunsure. E al sta pardabon miôr. Anzit, al sta ben! Al è di gnûf ferbint e plen di ideis.
Intal Avost dal an dopo, Ospirts, la sô gnove cliniche psichiatriche par curâ formis di stress fuart e voie di copâsi, no varà une sole stanzie vueide. Al à aumentât i presits, e no cate il cjaldonon, al sparagne adiriture su l’aiar condizionât.

di Rafaêl Serafin
#1333

2 comments