CorseCurteAvost#16 – Amont sul Lemit

#15 – Amont sul Lemit

Tornânt di un gjite, Zuan, Gjonde e Marte a si cjatin a Puart, citât cetant lontan di Palme ma lûc di origjin dai parincj di Zuan, che a nol piert timp a contâ che il Nievo le veve clamade “Piçule Vignesie”.
Jentrânt de puarte di San Zuan, a passin sot dai puartis che a metin adun i antîcs palaçs dal centri, ricuardâts ancje di Sgorlon. In curt a rivin ae place cun l’antîc Palaç Public, decorât cun curmei zimui.
“Ben, a è une citât cetant biele e antighe, bielissims i palaçs e i puartis.” I fâs Gjonde.
“Sì, il biel centri cun i canâi i da un aspiet pardabon romantic. Al è par chest che tu i tignivis tant a menânus achì, vere?”
“Verementri il miôr o vês ancjemò di viodilu, vignît!”
Al è un puarti che al passe in bande dal palaç public, Zuan al compagne lis amiis par chel passaç che al va jù viers alc che al somee a un lât. Cuant che a rivin ae fin dal puarti, lis frutis a restin amiradis: il puarti al finìs propit a ôr de aghe di un flum che al taie in doi la citât, su la rive a si vierç une plaçute cun puartis e palaçs, di chê altre bande un zardin e a mont un puint cun doi mulins, la aghe a è plene di pes e sul flum a si viodin reis di gjarigule, rassis, uciei.
E je la fin de zornade e a tachin a viodisi i colôrs dal amont, la lûs e riflet su le aghe e sui mûrs dai palaçs cun colôrs cjalts intant che al sofle un aiarin lizêr, tipic di une sere da la fin da l’Istât.
“Graciis Zuan chel puest achì al è verementri biel!” I fâs Gjonde.
“Ma cumò al è miôr che tornìn indaûr in curt.” Si zonte Marte.
“Parcè, no sin mighe tart, no vês dit che a us plâs chest puest?”
“Il puest al è bielissim ma al sta lânt juù il soreli.”
“E alore, ce che al è?”
“Al è che, cuant che al va jù il soreli, e rive la barcje dai benandants.”
Zuan nol rive a capî, e Marte e zonte dome: “Striis e benandants a no van dacuardi, Zuanut!”
“Ancjemò un moment.” Al rispuint dome Zuan.
Si fermin alore a viodi ancjemò il panorame de plaçute che al si font cun lis aghis dal Lemit ma, cuant che il soreli al è aromai par là ju, lis frutis si fasin segn che e je ore di là vie.

di ***
#1***

2 coments On CorseCurteAvost#16 – Amont sul Lemit

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît