#10 – Chel amont sul plaçâl dal cjiscjel
Si vevin cognossûts intun lunis di Pasche, tra plats di pastesute, salam, formadi, persut e gjardiniere, e tant di chel vin che a la fin no si rivave plui a stâ drets e a cjacarâ cun sintiment cence tirâ fûr dome strambolots e ridi par ogni monade.
Ma al jere alc che ju faseve restâ simpri un vicin di chel altri, a cirîsi cui voi, a volê cognossisi, cence stracâsi di cjacarâ dome tra di lôr. E cussì pe prime volte a àn stât daûr insiemi al amont dal soreli.
Di lassù, metûts in pîts su chê bancjute di len piturade di vert, si viodeve parfin la striche di mâr di Grau, e il rimirâ la bale lusinte dal soreli che al stave lant a plancut a durmî, fasint capî che la zornade cun lui e stave par finî e che al lassave il puest al lusôr de lune, al à fat sì che chei doi frutats, come che al sucêt di simpri in dut il mont, prime si son strenzûts lis mans e dopo no àn podût fâ di mancul di bussâsi.
Un altri meracul dal amont.
Un altri meracul che al fâs l’amôr.
di Renzo Turùs (Il Fi di Marie dal Cafè)
#1343
