CorseCurteAvost#06 – Lusigne intal nuie

#06 – Lusigne intal nuie

Il vecjo al jere tal curtîl daûr di cjase cui voi pierdûts tes flamis dal fûc. Un pît al polsave sore te pale e lis manis sul mani. Il cuarp al jere mieç tal sflandôr, mieç viers la gnot.
Al cjalave come la ultime lûs dal dì i radegave al lusôr dal fûc i contors di arbui e cjasis. Al jere une vore di timp che al riceveve il amont in solitudin e cuntun vêl di avilizion.
I ricuarts a vignivin fûr ingarbuiâts in chei crepuscui di brusade di cartons e scovacis: la rivade al puart di Santos, la aghe sporcje ta lis stradis infolcjadis, il camion scancarât che al à puartât i trê fradis de citât al implant. La sensazion di cjalt e umiditât simpri presintis. La ligrie di une femine e i fîs, che i volevin ben, sigûr, ma che mai a saressin rivâts a capîlu. La dì che nol è restât nissun in chel cjanton di Brasîl cun cui fevelâ la sô lenghe. La sclete prosperitât te borgade vicine dulà che al veve fât sù cjase e metût sù une piçule buteghe. I nevôts. La muart dal fradi plui grant, simpri di cûr debil. La tornade ae patrie dal plui zovin, ricevi e lei sôs letaris, ogni volte di arc plui grant, letaris dulà a si jerin trasformâts in creançôs scognossûts.
La sô voglade si pierdeve ator des boris che si studavin cuant che une idee teribil lu scossà: il câs di sveâsi une volte che si lasse chest mont, ma cuntune cussience che nome e duràs frazions di secont, lis necessariis par percepî che si è devant a un grant vueit cosmic, un nuie assolut. E in chestis frazions di secont la cussience, prime di studâsi par simpri, e comprovarès cuntun ultin scatûr che plui in là nol è nuie.
Nome une lusigne intal mieç dal vueit.
Tal lontan, une femine e clamave so fi. Il vecjo, come sveantsi, si distirà. Si voltà e al cjalà par un baticei la sô stanzie vueide e scure. I rivà l’arome di stufât. Al ficjà la pale te tiere e al le te cusine par un pôc di companie, vosarili e lûs, ancje se al disè a se stes che e jere parcè che che al veve fam.

di ***
#1***

3 coments On CorseCurteAvost#06 – Lusigne intal nuie

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît