CorseCurteAvost#03 – Sentât te bancje

#03 – Sentât te bancje

L’om sentât te bancje de place si cjalà lis mans, inclinât indevant cui comedons parsore dai zenoi, come se no lis vès mai viodudis. Lis zirave par tentâ di ricognossi ogni grispe, ogni magle. Al veve i dêts de man drete tacoladis di nicotine, chê man che ogni tant al alçave par gjavâsi i cjavei devant de muse e che si fermave maraveât tal mieç dal moviment. Luncs cjavei dorâts che lu vevin involuçât intorsi cuant che al cjaminave tant che a fossin il tabâr di un re. Chei cjavei a jerin stâts i prins a bandonâlu.
Cjalant parsore il cîl, al sbassà il cjâf. Proprit lui che si faseve simpri plui grant e maestôs cuant che al zirave e al balave sot il sflandôr. Une sô cjalade fonde e jere buine di cidinâ ducj, e cuant che al alçave lis mans al podeve impiâju fin che il so non al sunave in dutis lis bocjis.
La lûs te place e lave vie e lis ombrenis dai morârs lu vevin za taponât de int. Un aiaron al jere rivât de bande dal bosc e al sintì frêt. Lui che al torzeave la gnot vistût dome cui bregons e il gjilè di corean, e dôs fantatis a bracecuel par riscjaldâlu.
Al veve fruiât di svelt dut: amîs, feminis, butiliis. E soredut timp, che al brusave di corse jenfri lis mans. Chês mans che cumò nol rivave nancje a ricognossilis.
Sentât ancjemò, al bateve i claps dal paviment cuntun pît, biel marcant il timp di une musiche che al sintive dome lui. Aromai al à cetant timp che i vanze che al podarès ancje regalâlu se al fos cualchidun dongje. Al à vivût gaiarin, plui adalt dal mont, cence pensâ masse al futûr.
Ma l’amont al è bielzà cumò.

di ***
#1***

2 coments On CorseCurteAvost#03 – Sentât te bancje

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît