CorseCurteLui#10 – La ultime gote

#10 – La ultime gote

Soi, jo, la ultime gote di aghe. Di preseade aghe.
Simpri mancul a bagnâ la tiere sute, come desert in plen Istât.
Il soreli matucel e la umanitât fûr di cjâf mi stan suiant, copant, scancelant.
Gno pari, il nûl, non è plui bon nancje di vaî par me. E par se stes.
Al à la bocje masse sute, i voi sierâts, cence plui ploie di butâ sul mont.
Puar mont!
Al sucêt di dut: maris che copin i fis, fûc che al bruse ogni lûc, e par man umane – chel al è il brut –  vueris e la mê famee di aghe nete e simbul di vite che e sta supant pantan.
I arbui, cence la mê ploie, no àn plui sostance par lis fueis, che a colin, secjis e avilidis, fin dal mês di Lui.
No rivi a crodi, jo. Mi ven di vaî, ma no pues, o ai di tignîmi di cont: soi une gote di aghe frescje e o ai tante pôre di murî.
I arbui, o disevi, a alcin i braçs al cîl, preant i nûi di vierzisi.
I fics a son butui di carton. I grignei dentri dai miluçs ingranâts za spacâts, son spavits come cadavars.
La jerbe e je paie, i flums deserts, il cîl al bruse di masse cjalt, e bisugne sparagnâmi: vuai bagnâ!
Intant, jo, ultime e piçule gote o cjali e no pues fâ altri che involucjâmi intal gno cûr licuit e preâ.
No ai imparât lis prejeris, jo, no ai mai vût mût ni bisugne di imparâlis. Cumô lis inventi e o feveli cul Signôr, i conti dut chel che o viôt, e speri che mi scolti e che al fasi alc par salvâ cheste tiere sfortunade e cheste umanitât selerade.
Jo o tos e o trimi e o pensi a ce che, jo, pues ancjemo fâ, cui che o pues judâ.
O viôt une bore gnove, colade dentri de tane di une famee di furmiutis lavoradoris e sioris di pâs.
In file ordenade, a scjampin dulà che miôr a podin, par no scotâsi.
Eco, mi buti parsore, culì, in mût che al podi distudâsi e lis furmiutis a podin tornâ inte lôr cjase.
Amancul lôr.

di ***
#1***

3 coments On CorseCurteLui#10 – La ultime gote

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît