CorseCurteLui#03 – Secjarie

#03  – Secjarie

Nissun si impensave di cuant che e jere rivade. Forsit dal Istât passât chê femine viere tant che il mont e veve scomençât a torzeâ il paîs. No fevelave, ma i siei voi a someavin zuiâ cun la lûs dal soreli, sflandorôs. No jere cidine dal dut, un rumôr sfumât si sintive ator de sô muse, un ridi sclet.
I prins a son stâts i cjans che si jerin svicinâts par nasâ lis mans che e veve simpri viertis, pontant pe tiere. Si fermavin di colp e a ziravin il cjâf come che a fasin cuant che no capissin alc. Chê viere no puçave di nuie. Cence odôr.
I seconts a son stâts i canais. A lavin a cjatâle parcè che e butave simpri fûr dal grumâl par lôr piçui regâi. Un miluç, dôs coculis, une grampute di moris. Ma ancje i fruts a vevin molât di cirîle, stufâts di chês robutis cence gust, insavoridis.
Di Invier i oms le cjatavin a buinore denant de cjase, cuant che a fasevin fadie par vierzi la puarte. A cjalavin il paviment, il cîl e ae fin jê. Ma la cjalade le traviersave come se e fos di veri, stralusinte. Biel neant cul cjâf, a lavin a vore cence capî ce robe che e veve blocât cussì tant la puarte.
Te Vierte a vevin scomençât a murmuiâ che a jerin mês che nol ploveve. Almancul dal Istât passât, si jerin metûts di acuart te ostarie e tal marcjât. Cuant che il cjalt si è fat bon di batiju i cjâfs cence padin, si jerin zontâts devant dal Municipi, ma ancje il Sindic al jere in pinsîr e al veve bielzà scrit aes autoritâts.
“Ma sêso mats?”, al berlà chel vecjo che ducj a crodevin inbambinît dai agns, ma che un dì al veve decidût di no fevelâ plui cun chel paîs di çondars.
“O sês vuarps, chest sigûr!”, al disè segnalant la femine che tal mieç de place e zirave cui braçs adalt. E rideve a crepepanze. Ducj i suns si jerin cuietâts, dome la sô ridade e tornave a petâ tes orelis e il paviment.
Inmagâts a vevin alçât i voi tal cîl, e finalmentri al veve tacât a plovi.

di Noemi Salva (Passarute)
#1312