CorseCurteLui#01 – Il tai

#01 – Il tai

Cuant che al beveve un tai di vin blanc glaçât al scugnive simpri pensâle.
Si visave di cuant che jê lu spietave, statuarie e sclagne, rimplatade cu la gorne di chel palaç, la sere che al jere passât a cjolile par lâ al conciert, tal Istât di cualchi an indaûr. Cjavei formentins, vistît neri e cjalcis a rêt.
E jere stade une biele aventure ancje se durade pôc. Dal rest, une storie dal gjenar no podeve durâ stant che lui al veve il dopli dai agns di jê. Sì, a vevin alc in comun parcè che ducj i doi a jerin inteletuâi e la femine e cognosseve la musiche che i plaseve a lui, chê dai agns ’80 e ’90, e cussì al jere stât facil convincile a lâ a viodi un cjantant matusa.
Ma dopo de sere che si jerin cjatâts ta chê ostarie in centri e a vevin cerçât chel vin jê i veve scrit che lui, cence rindisi cont, al jere deventât masse tacadiç e che se lis personis si viodin une o dôs seris nol è dit che si vedin di tornâ a viodi intal avignî.
E lui, di chel so pinsîr, al veve fat tesaur… al veve smetût par simpri di fâ il mone cun feminis plui zovinis.
Ma ancjemò il pinsîr lu tormentave. Cuant che cui amîs al cjoleve il vin blanc che tant i plaseve al pensave simpri a la femine cui cjavei formentins e il vistît neri, sclagne e statuarie che lu spietave dongje de gorne… e sameave a lis feminis di Mazone, chês dal cjarton animât “Captain Harlock”. E e jere cussì biele e inteligjente e culte.
Vonde! Vonde cun chel ricuart che i faseve mâl. A un ciert pont al tacà a no lâ plui tes ostariis e, se propit al scugnive, al domandave dome aghe. Une tace di aghe. Simpri aghe. Aghe cristaline, divignince de vite, che e cuiete i desideris, che ti fâs dismenteâ…

di ***
#12**

2 coments On CorseCurteLui#01 – Il tai

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît