CorseCurteJugn#17 – Devant di chel spieli

#17 – Devant di chel spieli

Come ogni matine, Toni al va tal bagn a lavâsi, dopo vê bevût il cafè. Si met denant dal spieli e si cjale, cheste volte plui atent dal solit. Vuê, cuissà parcè, i pâr di viodi di front di lui un om diviers: un che al tache a fâi domandis, un che al vuel fâlu rifleti, che i sgarfe dentri in profonditât. E cumò al scomence ancje a tontonâlu:
– Ma tu, sêstu content di chel om che tu viodis ta chest spieli?
– Cui ise in realtât la figure che ti si presente?
– Se ti son colâts i cjavei, se la barbe ti je deventade grise e tu âs lis grispis inte muse, al vuel dî che un grum di carnevâi a son passâts e i agns a son lâts sù ancje par te: cemût âstu doprât dut chest timp?
– Cjaliti ben e domanditi se tu sês sodisfat avonde di te, de tô vite, di ce che tu âs fat fin cumò!
– Cemût ise stade a la fin dai conts la tô esistence? Âstu realizât i tiei siums, lis tôs passions? Âstu cjatât il lavôr che ti varès plasût?
– Ce ti mancje ancjemò par jessi braurôs di te, di dut ce che tu âs fat fin cumò, par podê dî di jessi complet?
– Âstu forsit lassâ passâ il timp cence fâ nuie par chel cristian che tu âs di front?
– Ti vuelistu avonde ben par decidi finalmentri che ancje tu tu âs dirit di passâ plui timp cun te stes ? Tu sâs di sigûr che il timp al svole vie, che al è un grum preseôs e che tocje fâlu rindi, profitâ di ogni so moment, di no pierdilu a stupit vie, ma servîsi di lui inte maniere plui juste?
– Si rindistu cont che nol è plui timp di pierdi par intervignî su lis robis che no tu rivis a cumbinâ o che tu continuis a rimandâ ?
– Cjaliti ben ator e tu viodarâs che ducj a àn i lôr fastidis, che nissun al è perfet, che il timp al passe inesorabil par ducj, e che no si pues tornâ plui indaûr!
– A la fin Toni si cjale tal spieli une vore plui stranît e imbambinît, e si domande se no sedi stât dut un sium. Ma i restin ancjemò tal cjâf dutis chês domandis cussì profondis che prime no si lis veve mai fatis e che cumò i àn disledrosât il stomit e il cerviel…
Alore cumò provait ancje voaltris, magari par zûc, scomençant di doman a buinore, a metius devant dal spieli e a fâus chestis domandis ! Spietait un moment e lassait che lis rispuestis a vegnin fûr no dal cjâf ma dal cûr e dal profont de vuestre anime, e visaitsi che al è simpri ancjemò timp par comedâ, par decidi, par jessi complets e sodisfats de vuestre vite…
Buine fortune e fuarce e coragjo a ducj!

di Renzo Turùs (Il Fi di Marie dal Cafè)
#1299