CorseCurteJugn#10 – Il timp

#10 – Il timp

Il timp, ce si pues dî dal timp…! che il timp al passe…, che no si ferme…, che nol torne indaûr. Ma tal gno cûr e tal gno cjâf il timp si môf e al va indaûr di une bande a chê altre.
Al scomençave un crudêl Invier e o ai cjatât un maion fat di lane rustiche, gjavât di une cassele dal armaron, cuant che mi è vignût iniment il timp passât cuant che gno pari al à puartât dal cjamp un sac plen di lane di pioris. E mê mari e veve dit “Berto parcè puartistu cheste robe dute sporcje?” e gno pari al veve rispuindût,
“Femine! Spiete un pôc! Sâstu cetantis cjossulis che si podaressin fâ cun cheste robe?
Al à netât dutis lis porcariis de lane, le à lavade e le à lassade tal soreli parcè che l‘aiar le secji.
Alore al è lât a cjase de agne Elisa a cjatâ il burniel fât dal nono Costantino in Friûl, ma lu veve vendût a sô comari.
Cussì al è lât de comari a domandâ in prestit il burniel. Ma l‘imprest al jere ocupât, cussì lu à cjalât ben e lu à copiât par fâ un compagn. Dome che lui i metè un motôr piçul par fâ subit il fîl di lane che al ven intorteât.
Cuant che mê mari e à viodût chê biele lane i à dit: “Jo o pues fâ un maion!”
Tu puedis fâ tantis robis, maion, siarpe, cjalcis par ducj!
Mê mari, cuntun ramaç piçul, e à fat cu la gugje di len. E cu la lane rustiche nus à insegnât a lavorâ la maie. Ancje jo e lis mês sûrs, gno fradi e gno pari a gugjavin denant de stue di len.
In chel timp dulà che no jerin la television e i telefonuts, gno pari e mê mari insiemi a àn fât in mût che nô o restassin cuiets e cun di plui fasint une biele vore.

di Cristina Degli Uomini (Lune Platade)
#1292

2 comments