CorseCurteJugn#09 – Il mani dal ristiel

#09 – Il mani dal ristiel

“Nono, nono! Ven fûr svelt!!! Cor, anìn a viodi l’arc di San Marc! Dai mo, moviti che nol è timp di piardi!”
“Cumó, cumó, ce presse!” al rispuindè il vecjo tant che sul so banc di lavôr al jere daûr a regolâ il mani dal ristiel.
“Nono, anìn che no vin timp di fâ faliscjis!”
Il frut al simiotave peraulis sigûr sintudis di sô none, ma al om i vevin tornât  smovi pinsîrs aromai ricorints. La malatie e steve lant indevant a la svelte, i vevin dit i miedis. Masse svelte, al pensave lui. E il cjâf al coreve par daûr a dute chê infinitât di voltis che al veve doprât malamentri il so timp.
Masse adore o masse tart!
Cussi i pareve che e fos lade la sô vite: simpri fûr timp!
La vôs insistente dal canai lu scjassá vie dal so cjalâ tal vueit!
“Nono mi scoltistu?!”
L’om al poiá il mani di len cjalant ingropât il frut.
“Sigûr che ti scolti ninin! Ce fasino ancjemo ca! Fûr di corse, no volarino migo rivâ tart e lassâsi scjampâ l’arc di San Marc?!”
Cjapant sù tal braç il piçul e striçantlu plui fuart che mai a lerin fûr de puarte che e menave viers l’ort.

di Michêl Londar (Sporting Brugnul)
#1291