CorseCurte#15 – Jê

#15 – ­­Jê

Gustâf al jere scritôr. La sô ultime novele e veve vût un impuartant sucès, a tal pont che za e leve pe tierce edizion.
Al scriveve dome di gnot, cuant che fûr e dentri cjase i rumôrs si cidinavin.

Tai ultins timps al veve scomençât a cjapâ notazions par une gnove novele. La protagoniste no veve ancjemò un non: Gustâf, pal moment, le clamave Jê.

Al pensave di scrivi sore la vite di une grande balarine, une etoile, che agns indaûr e veve vût grancj sucès, ma che cumò e viveve ossessionade, za che in curt e varès dovût bandonâ i senaris. Jê, no si rassegnave a invecjâ, e veve scomençât a investigâ sore i trataments che la medisine e la cosmetiche a ufrivin par rimedeâ i efiets dal pas dal timp. E veve tante bisugne dai batimans dal public come dal aiar che e respirave.

A Gustâf no i scjampave che, in realtât, il vêr protagonist di cheste novele al jere il Timp, scrit cussì, cun maiuscule, che dome cul so passâ al convertive i fruts in zovins, ai zovins in adults e ai adults in anzians. Ven a stâi che chê inevitabil fuarce de nature e à la potestât di modelâ la cjar vive e palpitant come che, dome un scultôr al po fâlu cul marmul e cussì trasformâ une timide e biele zovenute intune fragjile anziane o un snel e arogant zovin intun vieli malsigûr.

Al cricave il dì. Gustâf al distudà l’ordenadôr e si disdurì, si sintive sodisfat, la gnove novele e steve rivant a un bon pont. Si jevà in pins lant viers il dormitori, rivât che al jere al vierzè la puarte dal armaron, il spieli i mostrà la sô figure, Gustâf si cjalà in maniere atente… i cjavei, za sgrisulâts, a scomençavin a srarîsi, tal cerneli si viodeve cualchi grispe e cundiplui si inacuarzè che la sô cjalade za no veve chê vivarosetât di altris timps. Al suspirà e rassegnât al capì che il Timp al steve puartant indevant il so cefâ.

di Galliano di Buenos Aires (Sicheduncje)
#1297