CorseCurteLui#06 – Licuits

#06 – Licuits

Si poià cun la man intal mûr intant che al molave une lungje pissade. Masse bire. Al cjalave cun lambic lis gotis di ploie tal vieri, e la lune daûr. Prime di tornâ tal bar al respirà profont e si secjà il sudôr dal cerneli.
Le viodè sentade metisi dôs gotis di profum daûr des orelis. Lu invadè il ricuart di chel cuel lunc e profumât parsot dai siei lavris. Daspò al viodè incrosâsi lis sôs gjambis lungjis e i vignì la aghegole.
Par trop che i displasès, al doveve ametilu.
Cuant che Rite lu viodè vignî e displeà un grant riduç. Pauli al tornà indaûr a mieç, si sentà in bande tal divan e al cjalà la butilie di aghe che jê e veve domandât. Si servì un pôc par sclarissi la gole, dibot secje.
Rite e començà a fevelâi de scjampade al mâr des prossimis feriis. Pauli al scoltave dut di lontan, come imbombât. Al cjapà fiât, al poià la sô man sudade parsore de sô e al disè: “No”.
E al continuà: “Chest nol pues lâ indevant”.
I voi di Rite si umidirin intant che cun lentece a scomparivin lis vanziduris di un riduç glaçât.
Pauli al bevè un altri cluc e al tacà a esponi sgorgolant intant che la muse di Rite si jemplave di lagrimis cedis. Al contave de sô famee, dai siei fîs, des sôs responsabilitâts.
Rite lu scoltave cidine intant che cui dêts e faseve zirâ la butilie. Jê e stave come in ipnosi, finchè e sintì Pauli a dî che al voleve tornâ a stâ dal dut cu la sô famee, che jê e jere stade come aghe frescje intal desert ma che chest al finive chi.
Rite si alçà dibot. Lu viodè cui voi plens di rabie e i lavris strets. I disè: “jo ti neti, sta trancuil”.
Pauli al sintì l’impat de spudade intal mieç de muse e daspò sparniçâsi parsore dal so cjâf une frede sclipignade di aghe.
Intant che si suiave la muse cuntun grum di tavaiuçs, Pauli al viodè Rite lâ fûr butant par tiere la butilie vueide.
Pauli si visà che alc dal profum al jere restât inte sô muse umide. Al le fûr di presse cjalant il paviment. Si domandave se le varès cjatade ancjemò tal marcjepît, sot de ploie.

di ***
#1***

 

2 coments On CorseCurteLui#06 – Licuits

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît