CorseCurteJugn#06 – Timp e spazi

#06 – Timp e spazi

I cavalîrs a son lis struturis plui altis dai mûrs di Palme, ideâts da Juli Savorgnan par fâ di postazions ai canons e impedî il ripetisi dai fats di Nicosia. Cumò a son puescj ideâi par une biele viodude di adalt e, chê sere, Zuan al veve clamât Marte e Gjonde a viodi lis stelis cul so gnûf canocjâl.
“Pensait, i vuelin agns parcè che le lûs di chestis stelis e rivedi fin chi di noaltris!” Nol viodeve la ore di maraveâ lis frutis.
“Trops agns?” I domande Gjonde, intant che Marte e cjale intal canocjâl.
“Da chês plui dongje le lûs e rive dopo pôcs agns ma di altris i vuelin miârs di agns, di une altre galassie… pensait che le lûs de galassie plui dongje a rive a noaltris dopo doi milions e mieç di agns!”
“Le vite di un om e passe come un lamp in confront a chescj timps” e comente Marte alçant il cjâf dal canocjâl.
“Verementri!” i rispuint Zuan, cjalânt adalt lis stelis.
Inta chel moment lis frutis i van dongje e lu cjapin par man, come par compagnâlu intun viaç. Zuan a si sint strani, al cognòs ben lis costelazions e di solit a lis ricognòs subit, cheste volte però i pâr di no cognossilis plui, i somee che a vedin altris formis, mai viodudis prime. Dopo une prime sorprese al cîr di concentrâsi e di visâsi dulà che al veve za viodût chês formis, di bot i vegnin intal cjâf lis formis dai mosaics di Aquilee. Propit in chel moment lis frutis i molin lis mans e lui si sint come sveât di un sium.
Lis cjale e lôr i ridin, al volarès cjacarâ di ce che al veve viodût, ma Gjonde no i dâ il timp: “Tu pierdis masse timp daûr dai siums, Zuanut!”
“Noaltris o nin in place, si tu vûs vignî cun noaltris…” i fâs Marte, “ma se tu rivis tart, tu paiarâs tu di bevi!”
“Alore mi tocje za metile in cont, viodût che prime o ai di meti vie dut …”
“No tu rivis?” a lis frutis al ven il dubi di vêlu stiçât un pôc masse.
“Cemût no rivi? Vait indenant che o rivi in curt, no covente che stais a spietâmi!”
“Tu nus âs fat passâ une biele sorprese, Zuan, cheste sere ti ufrìn noaltris!” a concludin.
“Va ben, spietaitmi in place, a dopo!”
Cuntun pôc di imbaraç, Zuan al sint di vê segnât cualchi pont in chê sere cun lis sôs amîs.

di ***
#12**

2 coments On CorseCurteJugn#06 – Timp e spazi

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît