CorseCurteJugn#02 – Sassinaments

#02 – Sassinament

Sul imprin nol capìs ce robe che e je chel grum di no sai ce dongje de puarte de farmacie. La lûs dal display dal grant orloi i cole parsore, mo plui clare mo plui smavide. Al cjale ben e i cjape un colp: chel mismàs scûr al samearès un… Ah diu jo!
Par no savê ni lei ni scrivi al clame la polizie: al è culì un cadavar, jo no sai se al è vîf, no si môf, no sai ce fâ.
E rive la polizie, doi zovinuts che a samein di vê ancjemò bisugne de mame che ur tiri sù lis cuviertis.
No rivin a tirâ fûr nancje un ragn dal bûs, puaris animutis. Par fortune che al rive il comissari, lui sì che al è un espert, che no i scjampe nuie. A plovin domandis a ducj chei che al intive, cuant, parcè, cemût, cui, dulà, trop?
Une siorete lu met su la buine strade: Jo o ai sintût plui di une volte Loiko che al diseve che lui al veve di copâlu, chel lì, chel biât distirât lì, jo o ai di copâlu chel lì! al diseve.
Il comissari nol si piert in mignagnulis.
Loiko? Cui isal, dulà isal a stâ? Lait a cjolilu, menaitmal culì di strade!
– Sêstu stât tu?
– Sì, jo!
– Ah! E cussì tu mal disis?! Puartaitlu vie, in galere, sieraitlu intune scjaipule e butait vie la clâf!
Eco fate, in cuatri e cuatri vot risolt il câs.
Plen di sodisfazion il comissari i telefone a la femine par gjoldisi i compliments.
– E la vitime? – i domande la femine.
– La vitime? Ce robe la vitime?
– La vitime, cui ise, ce maniere ise muarte, sestu sigûr che e sedi muarte, ise muarte?
Usti! No i veve mighe pensât il comissari.
Svelt si inzenogle dongje chel puarin.
– Mandi, vitime, cemût vadie?
La rispueste i rive a bote e sclop: une curtissade intal cuel.
Al cole jù, il comissari, al cîr di fermâ il sanc e cun chel fregul di vôs che i reste al barbele:
– Ma alore tu no tu sês muart!
– Sigûr di no! Tu tu mueris. Chel sacravolt che al veve provât a copâmi al mûr, chê siorete lì e murarà, i tiei polizais, ducj. Ducj chei che a son culì e in dut il mont. Ma jo no.
– Ma… ce astu non, tu? Cui sestu?
– E ancjemò no tu le âs capide? O soi il TIMP!