CorseCurteMai#1 – La muse

#01 – La muse

E jere tremende chê muse.
Une muse di piere parsore di une cjase liberty dirocade intune crosere. E rideve. A disevin che e jere une cjase maladete.
Cristine e veve pôre di lâ a zuiâ li tra grabatui e baraçs e, ancje deventade fantate, no olsave mai, cuant che e passave par li, cjalâ chê muse.
I vielis a disevin che di gnot te cjase a fossin i spirts. Che la stesse muse e fos maline.
Nissun nol olsave plui lâ ta chê cjase di cuant che Zuan Ruan e Bortul Terençan a jerin muarts li dentri, cui diseve par masse vin e cui pe maledizion, vint cjalade chê muse maladete!
Ma une dì Fausto, il zovin che si jere inamoraçât di Cristine, no ricambiât, i veve dit che lui al varès vût coragjo a jentrâ dentri, ancje in plene gnot se jê daspò lu varès bussât.
Prime la fantate e veve fat cualchi resistence ma dopo e veve acetât e cussì il nestri Fausto une gnot al jere jentrât te cjase e al veve ancje cjalât la musate orende.
“Ridistu? Rît, rît, brute musate! Tant o sai che chei doi cjochetons no tu ju âs fats murî tu, ma il vinat”.

E cussì al le. Fausto al tornà fûr san e salf sul moment e ancje dopo no i capità nie di mâl. Anzit: al finì par bussâ Cristine e parfin sposâle un pâr di agns daspò. E al cjatà lavôr in bancje. Sì, la cjase, ben ristruturade, e deventà une bancje, us al zuri! E lui al le a vore li.
E la muse e fo lassade tal so puest, parsore de jentrade. E ancjemò in dì di vuê chei che a passin par li le viodin ridi. Ma cumò no fâs nissune pôre. La cjase e je stupende. E à mantignût il stîl liberty. Non son baraçs, no son grabatui. Al è un biel mosaic cuntun pavon suntun mûr.
E voaltris no stait a crodi a maledizions, che no sin plui tal Medio Evo e i doi cjochetons a jerin muarts cuant che al jere vignût fûr chel scandul dal vin coret cul metanolo.

di…
#***

1 coments On CorseCurteMai#1 – La muse

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît