CorseCurte#06 – La cjase

#06 – La cjase

Cuant co jeri frut, la vecje cjase di piere dai nonos e jere la mete ansiade des mês vacancis. Si cjatave intun sît di flabe, daûr di jê, cuasi cuasi si podeve tocjâ cun mans la mont Bernadie, devant e veve un prât e un riul che al menave jù a val la frescje aghe de mont.

Tes vacancis, cui miei cusins, o zuiavin di platâsi dentri cjase, che nus furnive un grum di busigatui e stanziis disabitadis, nus scuindevin sot des cocjetis  o tai armarons carulâts, che a vevin un odôr garbit a naftaline, dispès mi tocjave contâ a mi, o vevi il gno biel cefâ par cirî di scuvierziju.

A jerin vacancis ancje pe none che lis gjoldeve insiemi cun nô, intant che, pe nestre mirinde, nus frideve i flôrs dai coçuts cu la pastele. Cui nestris zûcs o sfantavin chel cidinôr che al regnave cuasi simpri in chê cjasone, che in altris moments e buligave di famee, ma il timp si incargâ di sparniçâju da par dut, ancje tal forest. Cumò a jerin restâts dome chei cuatri, che a voltis a stentavin a riunîsi par Nadâl e altris fiestis.

Une sere dal mês di Mai al rivà l’Orcolat, a bastarin pôcs seconts par sdrumâ une vite di sfuarçs e di lambics, i nonos a restarin sot di chê montagne di pieris. Cetantis voltis i miei di cjase a vevin insistût che se a fossin vignûts a vivi cun nô in planure, a varessin vudis dutis lis comoditâts in privât, ma nuie di fâ. Il nono al diseve:
– ca o soi nassût e ca o vuei lassâ chest mont, cuant che mi rivarà la ore – e al zontave altris considerazions. Si stentave a dai tuart, cjalant chel paradîs che lu circondave. E li i nonos a son restâts.

Par variis resons, sedi par lavôr, sedi par famee, la vite mi puartà a vivi mo ca, mo là e mo là vie, in dimoris diferentis cun dutis lis comoditâts, ma purpûr la vecje cjase di piere dai nonos e restarà par simpri:
LA CJASE.

di Galliano di Buenos Aires (Sicheduncje)
#1264