#03 – Il mâr in cjase
Mai al è un mês bielonon: l’aiar lizerin e cjalt il just, plen di parfums delicâts di flôr di naranç e bergamot.
I colôrs des begoniis a trasformin lis cjasis in palaçs dai siums plui biei.
Une cjase jenfri chês altris si distache, parcé che si pues viodile dal mâr, inte piçule isule, pierdude dentri l’ Ocean.
E je une cjase dute cuvierte di plantis rampicantis, verdis e colôr di rose impiât. Dome i barcons si son salvâts di cheste tele di ragn di flôrs.
Inta chê cjase nol vîf nissun, e aromai di agns.
E pûr, di fûr, in mieç a dutis chês ramacis e fueiutis, dentri lis sfresis dai mûrs, a vivin besteutis, ucieluts e ogni sorte di rais.
Furmiutis, in rie ordenade, a vegnin fûr e a rivin fin sore dal cuviert.
La lor piel e je pronte par bronzeâsi e il cjalt lis clame a lavorâ.
Parsore dai claps e da lis pieris si strissinin i insets, plens di colôrs e une vore tabaiots.
Daspò dal grant viaç, i uciei migradôrs a comedin il nît e a spietin i gnûfs nâts.
I prins a son i sturnei, daspò lis lodulis e lis sisilis balarinis.
Dopo la lungje durmide, si slumbriein lis besteutis e si strissinin dentri i claps, smicjant i mantei fofs, perfets par l’Istât che al vignarâ.
Oh, trop che si viodin biei!
Il profum dal mâr i fâs ghitis inte pansute e la fam si fâs sintî.
Samençutis e insets e deventin bon gustâ, propit cuant che lis gotis de Vierte a batin cun ligrie sore la lor schenute.
Fade Primuline e cjale e cjape note: ancje chest an e à fat un bon lavôr.
Ancje jê e à sielt un puestut par sé inte cjase devant dal mâr.
No juste pai oms, ma beât lûc par i pacjifics nemai.
Ducj diferents e pûr ducj amîs.
di Pierina Gallina (Gjaline Padovane)
#1261
2 comments On CorseCurte#03 – Il mâr in cjase
Le bielece che une cjase no reste mai bessole , ma ven strente di mari tiere che a planc a planc le tire dongjie a se , dopo vê dât vite a variis cualitâts di animai. Lussian
Pingback: FANTACORSECURTE – ZURIE DAI LETÔRS – MÊS DI MAI | Contecurte ()