CorseCurteMarç#24 – Flabe par une vite

#24 – Flabe par une vite

Lagrimis di soreli a travanin il ricam de tende, intun zûc di riflès che a sgurletin ator pe stanzie.
Ca di pôc la vite e madracarà pe puarte, ma par cumò l’unic a fânus compagnie al è il cidinôr che al rivoche dai nestris ricuarts.
Tu tu polsis intune galete di bleons, e a mi mi somee di no vêti mai viodude cussì biele, cun chê bocje che e plate un mieç riduç e i cjavei sgardufâts che ti cercenin la muse, gjavant vie i agns in plui. O resti da pît dal jet, cjareçant lis tôs gjambis framieç des cuviertis.
Ca di pôc ti puartarai vie dal to sium, ti judarai a jevâti in senton e ti petenarai la sassare salvadie intune strece, come cuant che si sin maridâts. O svuacararìn insiemi il savôr garbit de gnot intune zumiele di aghe frescje, po dopo la tiere ti regalarà un tic di lûs sui mêi e o puartarìn la sgrimie di un ros di fûc sui lavris. Par fâi scjas al destin, come che tu mi âs insegnât tu.
Ti onzarai mans e pîts, e gjambis e braçs, e ogni lenzude e sarà un rimpin pe memorie.
Ti metarai lis cjalcis cun chel dissen di rosis che si involucin sù pai zenoi, e no podarai fâ di mancul di pensâ a dutis lis voltis che tes ai sbregadis prin inmò di screâlis, e a trop che mi plasarès pierdimi ancjemò intal fof des lôr spinis.
Tu mi lassarâs disvidâ il tapon dal bocin dal to profum francês, chel che ti jere costât un voli dal cjâf e che tu vevis comprât prin di cognossimi intun dai tancj viaçs che o varessin vût di tornâ a fâ insiemi, timp o tart. Une gote par conole, une daûr des orelis e une ator dal cuel. E il gno dêt al svolarà su la tô piel e la mê bocje si svicinarà par discjoliti di chest striament maladet.
Ma cheste volte no tu sarâs plui la biele indurmidide, e jo no varai di jessi il to Chisciotte a scombati cuintri di ducj chescj mulins che si menin vie i tiei pinsîrs e la nestre vite. No plui.
Cumò tu sês libare. Il mâl nol podarà plui nuie cuintri di te. E noaltris o podarìn di gnûf jessi insiemi. Spietimi. O rivi.

di Fuguline (Cjicechepicjedispicjelacite)
#1228

3 comments On CorseCurteMarç#24 – Flabe par une vite

Leave a Reply to Anonim Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît