CorseCurteAvrîl#16 – L’om ostrighe

#16 – 04 L’om ostrighe

“Per le ostriche l’argomento più interessante deve esser quello che tratta delle insidie del gambero, o del coltello del palombaro che le stacca dallo scoglio.” G. Verga

Dì 1.
Mauro Tomat e Lupo Zeno Degli Antonini a son de classe, dal ‘52.
A son sentâts ducj i doi suntune cjadree blancje intune sale celeste. Odôr di clôr.
La notizie dal tumôr tal cerviel a Mauro je da il miedi di famee, il dott. Marco Facchin, in distret.
La notizie a Lupo Zeno je da l’illustre Dott. Gian Maria Airoldi, tal so studi in centri.

La uniche robe di “no butâ vie” di un glioblastoma al stadi 4 e je la paritât sociâl. Chel sens di jessi compagns. Pedoglôs o passûts, sotans o sorestants. Tu sês di bessôl ta une velme e ator la maree e cres… e cres par te, e cres par lui. E je bave nere, tacadice, e je penç pantan di muart che slichignot al sbrisse!

Dì 30.
La operazion di Mauro e je lade ben ma si trate dome di tirâ a dilunc. A Kevin, il fi plui grant, pensant ae puare mari muarte un an indaûr, i ven l’inzirli.
Il primari al dîs che la operazion di Lupo Zeno e à vût un risultât incredibil. Tal ambient universitâri si contave di cualchi câs sucedût te storie. Leone, il fi plui grant, al pense za a ce organizâ.

Dì 60.
Mauro al voleve jessi cremât e che si spandessin lis sôs cenisis te roie dongje cjase, dulà che al pescjave a moscje di piçul. Kevin cun grande emozion al sparnize ce che al vanze di so pari ma, a pene puartât insom il so volê, al à un svaniment e al cole tal arzin.
La perle enorme e preziose che al veve tal cerviel Lupo Zeno e je sul bancut dal batidôr a Sotheby’s. A son vignûts gjornaliscj di dut il mont par viodile e seics de Arabie par provâ a comprâle, base d’asta 5 milions di euros.

Dì 90.
Lupo Zeno Degli Antonini al à decidût di invistî chei 6.8 milions di euros pal futûr dai siei fiis comprant alc a ognidun. A Leone, cumò che si spose cu la fie di un nodâr, il titul di Diretôr Gjenerâl ta une fabriche gnove di pache.
Kevin Tomat al è sentât suntune cjadree blancje intune sale celeste.

di Rudy Citòs (Borussia Dordul)
#1247

1 comment