CorseCurteAvrîl#12 – Nexus

#12 – Nexus

Doi monts diferents. A jerin stâts fuarçâts a convivi, un cun chel altri, tal stes teritori, sot dal stes ream.

Purtrop no vevin rivât mai a vê une comunicazion clare e nete jenfri di lôr plui inlà di smaneçs corporâls e interpretazions di sunôrs. La sorevivence di ognidun di lôr e vignive daûr des lotis di ogni dì. No rivavin a metisi dacuardi par vê un intindiment di convivence pacjifiche. A vevin bataiât par teritoris e mangjativis par miliarts di agns cence rivâ a cjatâ un intindiment definitîf fale che cualchi piçul acuardi. A ogni mût a jerin individuis che a volevin fermâ i incuintris a ducj i coscj pûr la fuarce e predominave parsore la logjiche di ogni tip.
Si ben che une des dôs parts e jere in mût clâr superiôr a chê altre, chê superioritât e jere stade doprade dome par la concuiste dai teritoris e il sotanament dal aversari.

Par ce tancj agns la part plui debile e veve cirût di cjapâ une maniere di comunicazion. Intun determinât moment de storie a vevin crodût a ciert tip di individui che e faseve part de comunitât. Chescj a vevin un cerviel plui grant e a varessin plui pussibilitâts di svilupâ une capacitât di comunicazion plui eficient, ma purtrop un asteroit al slontanà vie cheste alternative. A vevin di spietâ une altre oportunitât.

Daspò cetant timp, cence savê cemût, i fats a someavin jessisi sledrosâts.  Jenfri une piçule comunitât al veve nassût un individui cuntune capacitât divierse. Al veve une valisie uniche che e varès cambiât dut par simpri. Chest esemplâr al veve svilupât la competence di fevelâ, di cjacarâ la lenghe che a dopravin tal mont dai sorestants.

Daûr cheste pussibilitât il consei superiôr si veve radunât par metisi dacuardi in riferiment aes primis peraulis a comunicâ al so dominadôr. Il consens si cjatà subit, si jerin metûts dacuardi a comunicâ cul lôr dominadôr il lôr pont de viste, e e je vignude subit la prime frase che a vevin decidût di pandi:  “ Lis bestiis o sês voaltris”.
E cussì e veve tacat la ribelion dai nemâi cuintri l’uman.

di Scalembrut
#1243

2 coments On CorseCurteAvrîl#12 – Nexus

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît