CorseCurteMarç#13 – In viaç

#13 – In viaç

Si sint strani, anzi nol è che si sinti propite lui, al è come un sentiment di jessi dut, une uniche robe cul jet, cul paviment, cul barcon… Il parquet al devente un flum plen di aghe colôr dal len, che e sbrisse vie cuant che lui al cîr di tocjâle. Jê si cjale lis mans e e môf plancuç i dêts… o sono paveis che a svoletin? Dal barcon e jentre lûs viole, rosse, zale e celeste che e si môf te stanze fasint grancj zîrs e dopo inrodolantsi a spirâl. Tantis spirâls, cuissà dulà che a puartaressin se un al jentràs dentri e si molàs jù! Lussie e Sanson a svolin, a balin su la aghe di parquet e i lôr cuarps si disfin intun insiemi di cjar e lûs. Lis palpieris di jê a platin un troi di mont dulà che lui al si incjamine: timp o tart al varà di rivâ al çurviel! Cuissà cemût che al è jessi un çurviel. Il çurviel nol pues jessi altri che une cocule zigante plene di sunôrs, un puest legri par fuarce! I lôr lavris si tocjin, ma al è come se a bussâsi al fos il mont intîr. Li dentri, jenfri di chei centimetris di piel a contat, al è pan ancjemò cjalt pene vignût fûr dal for, il celestin dal Tiliment cemût che si viôt di Pinçan, camêi in procession cu lis lôr bocjis di ridi surianis, violis a çufs tal bosc.
Lis mans di Sanson a cjareçin la schene discrotade di Lussie e a messedin oceans intîrs. Tra la sô lenghe e il cuel di lui a son madracs sinuôs, siroc clip e grignei di savalon dal Sahara. I cjavei di Sanson a cressin cence misure, e plui si slontanin dal cjâf plui a deventin grues. Ae fin, sblancjâts, si diramin in lidrîs che a van a cirî nudriment e semence. Il timp al passe svelt o forsit nol passe mai. Sanson e Lussie si cjatin inlidrisâts tal jet, lis lôr mans unidis tant che glicine ingropât. Sono in doi o sono in mil? Sono umans, plantis o bestiis? Ce impuartial?
A son ae fieste di complean di Max, te so cjamare, ma no lu san plui masse ben. A son in viaç.

di Margarite Cogôi (Volketitrei-Liga)
#1217