CorseCurteMarç#07 – Asaltos!

#07 – Asaltos!

Mandi, cemût? O soi Jelena. Óllafdóttir. Sì, sì, chê di Flôrs… di velen. Il gno consulent di Marketing, il mitic Rafa, ce plume chel!, mi à conseât di mantignî il stes formât di comunicazion e mi à dit di scrivi un test preseabil sore il teme Fieste, e o ai di dî che fin a cumò al è stât coret cui siei conseis: daspò la publicazion de mê conte la mê pueste eletroniche e je plene di domandis di ogni tip, cualsisei, dome al solit, di scartâ, e jere une che mi voleve par un tercet cul marît, o ai di dî che par un pêl no ai dit di sì, il so marît al jere propit un biel stamp!, ma no si devi messedâ politiche e religjon duncje o ai lassât pierdi.

Fieste: il teme al domande sfuarç: o ai simpri odeât lis fiestis!… une che par profession e cope la int no pues cjatâsi degne di socializâ cun lôr: al è compagn a nomenâ il cunin che tu âs di mangjâ!… Cuant che o vevi dodis agns e o dovevi assisti a une fieste, in chel moment o sin lâts a vivi in Argjentine, «asaltos»  a vevin non di chei incuintris, sì, «asaltos» tant che assalt (azion violente cuintri personis o ambients cul fin di robâ)… o lu sai: parcè che in Argjentine e parcè che assalt!… bo… o sin lâts là parcè che gno pari al veve cjapât un impegn cui servizis speciâi di polizie, no mi domandi plui, e assalts parcè che chei incuintris a jerin organizâts al galop, in maniere impulsive, e i lûcs dulà che si fasevin a jerin lis cjasis dulà che no vevin i gjenitôrs presincj, o a jerin scuindûts te lôr cjamare. I fantats a puartavin di bevi e lis fantatis alc di mangjâ. Ben, in chês fiestis si balave, e jo cjatavi il balâ tant che une cundizion scuasi animâl, degne biadelore de int sempliç, cence nissune sofisticazion, gno pari al paragonave il bal cu lis danzis di tribûs africanis e o vevi cjapât il concet dal dut, e cussì o mi scuindevi intun cjanton de cjase, il plui scûr miôr, e cjalavi i moviments de mularie cuntun miscliç di voie e dispresit: o vevi dodis agns ma mi sintivi tant che une none viele e mareose.

Vuê, o cjati lis fiestis dome un lûc par vuadagnâ clients: o studii i compuartaments des cubiis: se la femine e je contente o cîr une altre fin che o cjati une che mi somee jessi in barufe: là al scomence il vêr lavôr: Isal un probleme di base chi?… Aial il marît un caratar violent?… Vedie la femine un aiarin traditôr?…
Se o viôt un afâr in puarte o mi tire dongje e o tachi une conversazion… e chi o devi finî parcè che nol e logjic di pandi i miei sistemis di lavôr, par dîle vere.
Cun cheste ti ringracii pe atenzion e ti lassi la mê direzion di pueste.
jelenaolaffdottir@montvelenosis.com

di Marcelo Del Mestre (Argo Patùs)
#1211