CorseCurteFevrâr#20 – Semenâts ben e no mâl

#20 – Semenâts ben e no mâl

– None Iriiiss!
– Ce fâstu ancjemò sveât?
– No rivi a durmî, mi contistu une altre volte la storie de nestre famee?
– Va ben, ma cjâf sul cussin e voi sierâts…
Il frut si butà sul jet, e si metè sot des cuviertis.
– Tu âs di savê che la nestre famee e à une divignince antighe, secont un espert di Lyon, o saressin stâts parincj di Sâr Lancelot, il flôr de cavalarie, chei che si sentavin ator de taule taronde. Di chê volte, intun mût o in chel altri, o vin simpri vût a ce fâ cui flôrs…
– Sul serio?
– Come se no tu vessis mai sintude cheste storie, ma tâs cumò!
Il frut al riduçâ, tornant a sierâ i voi.
– O disevi, di chê volte, o sin stâts al servizi de corone di France, che al veve tant che simbul il fleur de lys; fin a to nono, dute la famee e jere tal esercit. Ma cuant che al è nassût to nono a jerin i agns dal pacifisim, e tô none bisse mi diseve che al jere nassût intun cjamp Hippie, di chei dal flower power, intant che a cjantavin “Mettete dei fiori nei vostri cannoni”.
– No ti crôt.
– Nancje jo no savevi se crodigji chê volte… Ma tu no tu vevis di stâ cidin?
– Sì…
– Vincj agns dopo, o ai cognossût to nono, che za al faseve il pancôr.
– E ce centrial?
– Come che al lavorave lui la flôr par fâ la paste al ûf e i biscots nissun altri. Al jere il flôr de flôr.
– E la mame che e fâs la floriste alore? Jê cun lis rosis e lavore e ancje lis piture!
– E se nol fos vonde sâstu dulà che e à cognossût to pari?
Il frut al jevâ in senton come une suste.
– Intune Dance Floor a Londre!
– Lôr le contin cussì e no sai se crodigji, ma se a fossin lâts a un cors di ikebana al jere compagn…
– La famee de mame e rive di Premariâs, e al pâr che e fos imparintade cun Flôr dai Libars chel che al à scrit il “Flos Duellatorum”, il flôr di bataie…
– Ma la storie no vevi di contâle jo?
– Tu âs reson, ma no viôt l’ore di savê se jo o varai alc a ce fâ cui flôrs.
– Al sarà timp ancje par te di sflorî, une dì.
– Buinegnot, none Iris!
– Buinegnot, Libar!

di Ferdinando Passone (Stale Rosse di Scodevacje)
#1195