FANTACORSECURTE – ZURIE DAL LETÔRS – ZENÂR 2022

FANTACORSECURTE – ZENÂR 2022

LA ZURIE DAI LETÔRS

Achì sot o cjatais la liste di dutis lis contis rivadis ae prime zornade di CorseCurte dal mês di Zenâr. Il teme dât ai partecipants al jere “Mascaris” e plui sot o podês cjatâ ancje une riflession sul teme, che nus à regalât Marcelo Del Mestre, dret de Argjentine.

Par votâ une conte de liste, partecipant come Zurie dai Letôrs, al baste lassâ un coment in chest articul, indicant cuale conte che us plâs di plui. Us ricuardìn ancje che, stant al numar dai partecipants, o vin aumentât i ponts assegnâts de Zurie dai Letôrs: 5 ponts al prim, 3 ponts al secont. 

Se o volês scometi su la vuestre conte e ancje partecipâ al FantaCorseCurte al baste firmâ il coment simpri inte stesse maniere (cul vuestri non, o ancje altri, al è compagn), cussì o podìn fâ la classifiche dal FantaCorseCurte e puartâle indevant ogni mês. Us ricuardìn che o cjapais i ponts de conte che o sielzêis. Si pues sielzi, clare, une sole conte.

Ae fin de liste des contis, se us va miôr, o podês scjamâ il pdf cun dutis lis contis, disponibil ae fin de lôr publicazion.

Si pues votâ, comentant, fin al 15 di Fevrâr. O tornin a ricuardâ ancje che a podin, e anzit, al sarès biel, che a votassin soredut i partecipants, se a vuelin ancje come anonims ma cul lôr non di gare. Dopo di chê date si scuvierzarà ancje i nons di gare di cui che al à scrit lis contis. Insome… plui int e vote sielzint la conte che e à miôr e plui la Zurie dai Letôrs e à valôr!

LISTE DES CONTIS IN GARE A ZENÂR

  1. Tomâtiere di Scalembrut
  2. Mascaris di Copasse Blu
  3. Ai confins de realtât  di Tapioca City
  4. Cence dint di Gjaline Padoane
  5. Il Ros e il Neri di Lupusinfabula
  6. Il Baûl des mascaris di Sicheduncje
  7. Zirâ jenfri la int di Passarute
  8. Dediche a un Lord, Rino che nol è plui di Motoguzzi
  9. Tarlecs e comareçs tal fogolâr di Rosute Pelote
  10. Mascaris e mascaris di Barba Pisul Stentadizza
  11. Il diaul di Sbreghebalon
  12. Tane par Toni di Stale Rosse di Scodevacje
  13. La fieste di Sporting Brugnul
  14. Cjavei secs di Volketitrai-Liga
  15. Trucs di Il fi di Marie dal cafè
  16. Yaguareté di La Sforadie
  17. La bolp di Real Cocâl
  18. Pavee di Cjicechepicjedispicjelacite
  19. Muse a spas di Vecjo Claes
  20. Lis Mariutinis di Nene Furlane
  21. Carnavâl contecurtâr di Boraite Falconete
  22. Mascaron angolan di Borussia Dordul
  23. Carnevâl de mê infanzie di Lune Platade
  24. Il tesaur dal flum di Atletic Gjatui
  25. Trasfigurâsi di Acuari Cence Branchis
  26. Conte no rivade di Cuelalt

SCJAME IL PDFLa Corse des Mascaris” cun dutis lis contis di Zenâr

Discjame dutis lis contis: 01-Corsecurte_Zenâr_Mascaris

E za che o sin, par ducj i partecipants che no viodin la ore di scrivi, o ancje par chei che a àn voie di jentrâ in gare cul mês di Fevrâr, o anticipìn il teme pe competizion, che al è… FLÔRS

___________________________

Elucubrazions sul teme des mascaris.

di Marcelo Del Mestre

“Impararâs, a tô spesis, che a dilunc dal traghet de tô vite,

tu cjatarâs tantis mascaris e pocjis musis.”

Vigji Pirandel.

Sin che i oms a àn vût cussience de lôr aparince esterne (auto-cussience?) a àn scugnût doprâ des mascaris.

Sul imprin de storie a jerin dopradis intai rituâi religiôs o inte incuintris des tribûs par rapresentâ o clamâ dongje i spirts benefics, e inte stesse maniere a jerin une garanzie di anonimât o un ricors par protezi la salût des utents.

In ciertis culturis a jerin dopradis pe cjalâsi dai nemis, o ancje par infondiji pôre, parcè che la muse francje nol jere avonde intimidatorie e a vevin bisugne di taponâle cun pituris o mascaris fatis in len o plenis di uciei par deventâ plui grandis o plui menaçosis.

Ae stesse maniere la mascare involuçant la muse no lassave viodi ai nemîs la lôr pôre e alore no someâve ai lôr voi une imprese facile. Esemplis di chest ûs a si cjatin intes armaduris gjaponesis, europeanis e dal Orient di mieç.

In diviersis culturis africans a jerin dopradis intes cerimoniis de iniziazion de pubertât.

Une mascare e permet ae persone di lâ fûr de sô nature fisiche ordenarie e cjapâ sù la identitât di une altre creature, antenât o fuarce sorenaturâl.

In gjenerâl, a lassin i oms a metisi dentri di univiers guviernâts par la imagjinazion o dimensions spirituals  invisibilis.

Cetants dai fats de nature che a jerin imbroiôs di spiegâ ai oms ordenaris a jerin capîts a traviers de chei imprescjs de ilusion e imagjinazion. Lis mascaris a àn vût un rûl avonde atîf in tantis civilizazions.

A dilunc dai timps a son stadis dopradis par sedusi o tentâ e ancje striâ imprudents. La mascare e deventave di chê sorte atraente, plene di bielece, inmagant al incuintri di trement.

Par inglês il tiermin mascara al e doprât par clamâ il rimmel o pituris par incrosâ lis ceis.

I cosmetics doprâts des feminis par imbeletâsi a costituissin juste une forme de mascare e al è dabon che il solit efiet dai sbelets e di dominâ e bati i mascli in maniere cidine. Il sbelet no dome al servìs par esaltâ la bielece naturâl des feminis ma ancje al permet di scuindi i difiets, duncje, al è, cun netece, un mieç di dominazion par ingjan. Lis feminis russis no lavin fûr di cjase cence il sbelet: (“pituradis tant che une  puarte” al disin ca, in Argjentine), par chês, lis feminis ocidentals a son “feminis cence muse”: il sbelet (la mascare) e je la leç di fonde de sô cundizion de femine: cence sbelet nuie femine!

I vêls islámics (hiyab) inte tradizions arabis a son une forme di mascare in chest câs par esaltâ la modestie des feminis e protezilis de concupissence dai oms.

Par altri i mascaris a àn vût ancje un rôl di control sociâl e di  comant in societâts come lis tribûs de la etnie di vuere, wobe, dan e guro in Liberie, in Africa; daûr di storiis, a son une vore di fuarcis naturâls che a vivin intal bosc e che a domandin ai vîfs, a traviers dai siums, i lôr desideris di re-incjarnâsi in cualsisei altri persone, chescj a saran daspò lis funzions che i vîfs a fasaran inte societât: un al domande di re-incjarnâsi intun judiç, un altri al fasarà il miedi, un altri alenadôr di vuerîrs, e vie indenant.

O vin fevelât fin chi des mascaris reâls, fisichis, ma a son altris, che o podìn clamâ virtuâls, chês a son lis mascaris che lis personis di vuê a cjapin intes rêts sociâls.

La persone che o soi in realtât no je vonde interessant par il rest de societât. O ai dibisugne di mudâ muse, di jessi plui sofisticât, di someâ a un altri, di meti une mascare per deventâ miôr, plui biel, plui tratîf. Cussì a aparissin, a saltin fûr inte socio-cyberspazi, personaçs talmentri stramps tant che i emuladôrs de Barbie o di Ken, i alters egos di Michael Jackson, i Elvis Presleys di mieze fruie e vie indevant.

Te Instagram o Muselibri, o Tik Tok, par nomenâ almancul três di une schirie de sîts, la int, in gjenerâl, a tint a indolcî la sô vite o i siei risultâts par otignî la aprovazion dai altris, par jessi cognossûts, par globalizâ la sô imagjin, par moltiplicâ i siei seguaçs al stes timp che lis jentradis economichis.

O pensi che, daûr dal spieli, e je une scugne plui basiche e mancul materiâl: jessi cualchidun… o miôr: CUALCHIDUN  e, dentri dal cjamp dal pussibil, jessi cognossût intal mont par un sôl non: Beyoncè, Cher, Prince, Madonna, Kim, Rihanna, e cussì vie. Par chel a doprin dai mascaris, invisibils in chest câs, cualchi volte a son mancul des efiets fotografics, smalts, Photoshop, però di soreplui, a montin sù une senografie fûr dal ordenari de lôr vite.

In fin dai fats a bevin tè in tacis di whisky par deventâ i personaçs che il mont al volarà ben, chel che lis lassi saltâ fûr de lôr vite avilide, sute o lamie intune di un altri dulà a vivin i famôs, i celebris, i innomenâts, chei che a son rivâts a jessi CUALCHIDUN. Cussì a passin lis oris a montâ sù personaçs invezit di personis.

Jenfri il teritori des mascaris virtuâls a son ciertis,  si ben che a son invisibils, che a àn ruvinât la civilizazion cetant plui che lis altris nomenadis fin chi e a son lis mascaris dal razisim, de omofobie, de asse raziâl e religjiose, lis mascaris che si metin i mats de potence, i bausârs patologjics (lei tai lavris: politics), chei che a lis puartin, psicopatics pal ordenari, son contents di freâ ognidun dut il timp: il biel fin al scuse i mieçs, e gjeneralmentri il biel fin al è chel di anulâ, sdrumâ, robâ, freolâ, ingjanâ e butâ jù dut il bon e il biel de tiere parcè che lôr a son i plui impuartants, i solits che al contin inte mont, e no imparin nuie di nissun parcè che lôr lu san dut e lu vuelin dut e cussì al è scrit inte libri dal univiers.

49 comments On FANTACORSECURTE – ZURIE DAL LETÔRS – ZENÂR 2022

Leave a Reply to Anonim Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît