#23 – Carnevâl de mê infanzie
Cuant che o jeri piçule, denant de cjase mê, gno pari cui amîs e vicins a fasevin il cjar alegoric par fâ part des sfiladis di Carnevâl. Chê prime che o ricuardi e jere pardabon une preson, une galere metude adun parsore la casse de machine Ford T di gno pari. Cun taulis e cjanis a faserin la cele de preson e sul tet a jerin une cjadree eletriche e cundiplui un patibul.
Ducj a lavoravin di sere e ancje te gnot par finî il cjar e par fâ i vistîts dai presonîrs e ancje dal vuardian. Cuant che dut al jere a puest, a lavin vie te sfilade dulà che si zuiave cun la int.
I presonîrs a scjampavin vie e il grues vuardian ur lave daûr corint jenfri la int. Su la cjadree eletriche al jere un zovin che al veve une malatie che i faseve tremâ e cussì al someave che al fos tacât pardabon ae eletricitât. Un altri zovin al faseve il picjât, cuntune cuarde tal cuel e une lenghe lungje di stofe rosse.
Ducj a jerin di bon umôr e legris, cul vivôr de partecipâ al Carnevâl dal paîs.
Daspò par chês altris sfiladis dai prossims agns a faserin la barcje pirate, il palaç arabic “Rajá de acá” e par fâle juste, une altre preson plui grande, parsore un rimorchi di camion tirât cul tratôr.
Ce bielis zornadis si vivevin in chel timp de mê infanzie!
di Cristina Degli Uomini (Lune Platade)
#1173
