CorseCurteZenâr#10 – Mascaris e mascaris

#10 – Mascaris e mascaris

Il zovin al vierzè i voi bruntulant, biel che la svearine dal telefonut e sunave un toc punk che nancje i plaseve, ma che lu tirave sù di suste dantij la juste dose di fote par jevâ e tacâ la zornade a blestemis.
Prime robe: meti sù il cafè; e intant fâ sù un spagnolet, vierzi il barcon, e tirâ uns dôs bugadis di salût. Nol è che i plasès, ma bugâ al jere deventât un abit che no i podeve fâ di mancul.
Par un moment, biel che al cjalave tal vueit, al zovin i vignì di bot di domandâsi cuant che al veve tacât a bugâ e se in chê volte i veve plasût; ma juste par un moment: sgarfâ te memorie e je robe masse impegnative cussì a buinore, e dut câs no i impuartave parbon. E cussì, chê pensade e fo daurman butade fûr cul prin sgardai spudât jù dal barcon. Al mertave plui atenzion chel, che no ce che i passave pal cjâf.
Daspò di chest, il cafè: neri tant che la gnot, cjalt tant che l’Infier, e trist tant che la vite: stes midiesim sproc, ogni benedete volte. Ma dulà che lu veve sintût, e cuant che al veve tacât a doprâlu, o se i veve mai fat ridi, a jerin dutis domandis che a chel zovin no i sfrissavin nancje il scus de cuissence, che cumò e jere masse impegnade a ignorâ il savôr di chel potaç e a fissâ dute la atenzion su l’orloi, che i sugjerive di spesseâ.
Si che duncje: poiâle, vistîsi, e lâ fûr di corse, biel sperant di no intivâsi cun chê ostie di carampane de vicine dal pat des scjalis.
Al jere dut cjapât dal daspâ cu la clavarie, cuant che une vôs daûr di lui lu fasè saltà pal spac.
«Bundì!»
E in fats vele ca chê sgrembie, pronte par tacâ boton. Il zovin al veve pensât di butâ chê grime jù des scjalis, ma nol fasè nuie.
Al contrari, al spampanà un biel riduç grandon e cordiâl.
«Bundì, cjare siore! Cemût?»
«Dut ben, ninin, avonde. Ma dipo, dulà vâstu cence mascarine?»
Il zovin al svicinà la man ae bocje, verificant che in efiets al jere lât fûr cence mascarine. Ma dut câs parcè no stave intal so, chê brute sbilfe?
«Po folc, e à reson…» al cisicà lui dut creançôs, biel pandint un altri riduç. «Me soi dismenteade.»
Ma in veritât, la mascare, la veve propri in biele mostre te muse.

di Enrico Tomasi (Barba Pisul Stentadizza)
#1160