CorseCurteFevrâr#03 – Nulôr

#03 – Nulôr

Il timp al bat. Un altri dì al va vie.
Sierât te sô preson scure, un dì daûr di chel altri, cence timp di inacuarzisi che za i à lassât te schene. La lûs no je neancje un ricuart lontan. No le insumie, no le mancje. Cui voi sierâts, e je une vite che al cîr une robe che nol à mai viodût.
I rumôrs a rivin da lontan, viludâts. No àn la fuarce di mudâ alc. No coventin a nuie.
L‘aiâr ator al è simpri compagn, ne cjalt, ne frêt. Cundiplui, no podarès dî ce robe che e je il cjalt. Nol cognòs neancje il frêt.
Cidin, cuiet, imobil, un presonîr de vite che no vûl molâ la prede.
Ma une volte al an, il so distac al piert la partide.
Chê robe che nol saveve di spietâ e scomence a nasâsi tal aiâr che al rive di fûr. Plan planchin si sint sveât par chest miscliç di odôrs.
A son chei dolçs che lu incjochin, che a deventin pesants tal nâs e a voltis al crôt di sintîju sore la lenghe. Chei citrics che a picin te gole i dan fastidi, lassant i pêi dal nâs indreçâts tant che soldâts sot dal scrutini dai gjenerâi. Chei garps i fasin balâ il stomi, intune danze in cubie cui pindui. Ma chei che di sigûr lu savoltin di plui a àn un alc di salvadi, sudât e sensuâl. I fasin vignî i pics.
Malcuiet, al cîr di movi i pîts e lis mans, tant che un diretôr di orchestre che al vûl comedâ la sinfonie dai odôrs che a rivin ducj insiemi, un parsore di chel altri.
Tal so jet, nuie al cambie, ma dentri il so mont al è sledrosât.
Chescj sens scordinâts i fasin bati plui fuart il cûr ingrumât.
Lis fantatis a viodin i segnâi e a corin a clamâ cualchidun.
Cuntune cjalade te muse piçule pierdude sore il cussin cjandit tal jet, il vieri miedi si maravee.
– Al è propit un orloi! Simpri precîs, un al podarès justâ il lunari cun lui.
– No ai capît professôr. – e dîs la plui zovine.
– Nus àn dit che nol è bon di sintî nuie, un vegjetâl di cuant che al è nassût.- e dîs chê altre, cui voi bagnâts di pietât.
– O sai… – al rispuint tornant a cjalâlu te muse.
– Ma sâstu fantacine? E je rivade la Vierte…