CorseCurteZenâr#08 – Dediche a un “Lord”, Rino che nol è plui

#08 – Dediche a un “Lord”, Rino che nol è plui.

Cu la mari di Rino no si scherçave, cuant che o lavin a zuiâ tal so curtîl! Dome se si platavin inte barache o podevin stâ in pâs! Ma dopo e capitave jê a cridâ: “Ce faseiso achì, eh? Us ai dite che o dovês stâ dulà che jo o pues viodius!”
Oh, il cjalt in chê barache di len! In te ombrene penze di profum a nô nus passave dute la voie di sberghelȃ, dute!
Cidins cidins si strussiavin tra nȏ e des voltis si disvistivin… il sudôr salât nus morestave, come se o fossin stȃts ducj in te stesse piel, inmatunîts, o svoltetavin di un a chel altri incussients come agnui in muel intun paradîs dolç di gjelsomìn.
Dopo o tornavin fûr un a la volte, Natalia, Rino, Silviute e jo.
Une dì jê e je rivade cuntune cassele plene di cartons, pinei e butiliis di colôrs. 
“Ve chi mo che o sês! Come simpri!… Vuê o fasìn lis mascaris!”. E à tabajȃt cun Rino e dopo e je lade vie. Rino al odeave fâ ce che i diseve sȏ mari, ma dut cȃs o vin tacât a taçâ i cartons e a piturâ, cun dute le nestre rabie.
Lui al a fat une mascare tremende. Un lupo! Neri neri cui dincj blancs, ma cussì brut!  E cussì trist, che no si podeve cjalȃlu. Jo no jeri cussì brȃf di piturâ e o ai fat un paiasso, brut, ma no trist.

Tancj agns dopo, un feravost o jeri ta cheste fieste di cjochelis, la famose “Sgombro Fest” tal casel abandonât, su le linee Vignesie-Triest.
Il sgombro, impastȃt intune pignate cun cuatri spaghets, al jere finît subit, e a restavin dome fuscj di bire e butiliis di rum, chel di cuatri francs.
Cjalt e muscjins, lis cassis a sgreseavin di un rock disperȃt, disperȃt come nȏ, i “Lords of Chaos” de Basse! Viva i L.o.C.! Simpri!
Jo o vevi a pene pierdût il gno lavȏr. Cjoc e avilît mi jeri butȃt suntune bale di stran, o vevi une strache di vivi ch’al jere miȏr dismenteâsi.
O jeri cuasi indurmidît cuant che o ai viert un voli e me soi cjatade in muse, e o ai cjapȃt un spac!
No podevi crodi. La plui brute mascare dal mont, un lupo!
A jerin vincj agns che no si viodevin… Rinooo!!!

di Leonore (Motoguzzi)
#1158

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît