Sta a cjase!

Cuant che o rivavi li dal cimiteri o pedalavi plui svelt. Par sghindâ chê vôs che o sintivi di un pôcs di dîs: – Sta a cjase!
Ma nuie ce fâ, e tornave ogni dì e ogni dì plui fuarte, e sclopave fûr des tombis: – Sta a cjase!
Fin che une dì no ti le viodio devant!
Viodi une vôs?! Ma ce dîstu? Une vôs si le sint, no si le viôt!
E pûr veh!
Vele lì!
– Ti ai dit di stâ a cjase! Parcè no vuelistu capîle?
Une vôs triste, e ven fûr di une sorte di bocje plene di muart.
– Ma ce aio di stâ a fâ a cjase?
– Iih, tu cjatis ben alc ce fâ! Simpri tu vais che no tu âs timp di scrivi, e scrîf, no, alore! Une conte, une conte curte.
– Oh no! Vonde scrivi! O cjapi sù la bici jo e…
– Sta a cjase! Capissistu nuie? Tu, parcè che tu âs dos mans, tu crodis di sedi cuissà ce! Viodistu? Jo o ai mîl mans. No son bielis come lis tôs, ma se ti tocji…
– No sta tocjâmi! Puare mai te, se tu mi tocjis!
– Ti ai za tocjât! No sintistu un fûc intal zerneli? Un trop des mês mans intal cuel? Dibant gratâlis vie, a son par dentri! E chel savalon intai voi? A son i miei regâi! Ti vevi ben dit di stâ a cjase!
Intal jet o çavariavi.
– E je une vôs! E je taronde! E à mil mans. E je fate di aiar, e je fate di nuie, ti beche, ti fas kiiik, mandaitle vie, ‘sta a cjase’ mi dîs, ma jo no soio a cjase mê?! Dulà soio? Ce bestie ise chê lì? Une vacje? Ma… soio inte stale? Ce fasio inte stale? Chê vôs vignude fûr dal cimiteri e cjamine cui scarabais, cui sgripions, cu lis pantianis, no, no cjamine, e svole, ti beche, o ai sêt, o ai stranfade la aghe, brocolat di un, ma no je aghe, no isal sanc!?
O çavariavi.
– E chê robe culì, ce ise cumò? Chê robe culì che mi sbavacje su la muse, ce robe ise?
– O soi jo.
– Cui, jo?
– O soi la vacje.
– Cui? La vacje? Alore pardabon o soi inte stale! Ce vuelistu vê, vacje?
– Se tu scrivis cheste famose conte, jo ti le mangj vie la vôs triste che e je daûr a dâti daûr.
– Ma…
– Dai! Scrîf!
E cussì o ai scrit. No je vignude cuissà ce. Ma ce pretesis! Provait vualtris a scrivi culis mans e la muse smaltacadis de sbavacje di vacje!

di Laurin Zuan Nardin
#1138
Conte vincidore dal Pôrecurte Day 2021

3 coments On Sta a cjase!

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît