Work at lightspeed!

L’opossum crudulît nol saveve se fâ fente di sei muart
o butâsi a scjampâ.

Breece D’J Pancake, Cjaçadôrs di volps

L’assistent di plan al da une cjalade tal ufici U422 e, cence saludâ i doi ocupants, al siere la puarte. Dentri, Lurinç e Pauli si scambiin une voglade cidine e si metin a fissâ il veri satinât de puarte. Dai rumôrs difûr a capissin che la operazion si ripet par ducj i uficis dilunc dal coridôr. Di bot, il veri opac al è traviersât de sagume di trê personis che a van di buride a drete, bande dai uficis de direzion. Te ombre denant a cognossin il coleghe Moret, di Tor, famôs in aziende pal paradòs dal programadôr (“se un program al è biel al è ancje just”). Daûr, doi de sigurece lu sburtonin cun malegracie. Pôc dopo, bas, su cuatri talpis bestiâls al passe un dai Gnûfs. A ret de puarte, l’individui si ferme, si alce sù su lis talpis daûr, si volte bande dal ufici e, dreçant lis orelis grandononis, al svicine il music a la targute cui nons, su la parêt.
Lurinç al è sudât in aghe. I mancje il flât e il cûr i salte tal pet… Cuntun sbalç si alce sù in senton sul jet. Dai scûrs e jentre une lame di lûs. E je matine. Manu e duar ancjemò cuiete dongje di lui. Al mancje un minût a siet e la svee e je pronte a sunâ. Lurinç le bloche e al va in bagn. Dut come ogni matine. Barbe. Une doce svelte. Gulizion. Il diret par Triest. Il sîs fin ai zardins. L’ufici.
Te jentrade a plan tiere, sul panel a mûr al côr il gnûf mot aziendâl, “Work at lightspeed!”. In assensôr, i ven iniment la frase a efiet doprade doi dîs prime dal president – un pulzet di trente agns, gnûf ancje lui – par sierâ il company meeting: «Visaitsi! Il cangûr, no l’opossum, al à di sedi il riferiment pal vuestri mût di lavorâ!»
Jentrât te sô stanzie, al cuart plan, Lurinç al viôt che Pauli nol è ancjemò rivât. Strani! In ducj i agns che a lavorin flanc a flanc e sarà sì e no la tierce volte che al rive prime lui. Si sente al so puest e di une pile ben intassade di cartelis al tire fûr il studi par ativâ la conservazion digjitâl dai documents. Si trate di une materie delicade. Dut al va stazât ben, cence premure, e lui nol intint di fâ gjatuts vuarps. Tal so lavôr al à simpri vude une precision puntiliose, cualitât di valôr ma che pal timp che e cjape ti fâs someâ lent. E intune scuadre dulà che ducj a àn di cori tant che cangûrs, nol è puest pai rifinidôrs.
Di bot, tal coridôr, a man çampe e sbat une puarte. Po dopo une altre, plui in ca. E ancjemò une altre, simpri plui dongje. Lurinç al viôt a rivâ imburît un dai servizis centrâi, che al siere la puarte di face ma al lasse vierte chê dal so ufici. Lis sbatudis a van indenant a man drete, fin insom dal coridôr.
Lurinç al jeve sù par scjampâ fûr, ma il passaç al è blocât di un animâl precîs di chel dal sium de gnot prime, che lu fisse impenetrabil. Dreçât su lis talpis daûr, bocognonis, in ecuilibri suntune code poderose, a colp al tire sù lis talputis denant, sproporzionadis di tant piçulis, come un pugjil cuant che si met in vuardie.
Lurinç al vierç disperât il barcon di rimpet, ma la stradute didentri dal edifici e je cuatri plans plui sot. Par li no si pues scjampâ. I ven sù un sfuarç di gomit di no podê tignîlu.
Si lasse colâ par tiere in bande de scrivanie.
Fer imobil, al fâs fente di sedi muart.

di Gianfranco Pellegrini
#1149
Conte seconde classificade a Vôs de Basse 2021

1 coments On Work at lightspeed!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît