La forme de fumate

Batist ju viodeve vignî fûr cul cricâ de albe, juste indevant dal canelâr dulà che e finive la tiere arade. Lis cjalave dal cjadrein dal tratôr, intant che il motôr al tacave a scjaldâsi. Pe sô prime Sierade in chel cjamp al crodeve di imagjinâ contors di fantins, braçs, cjâfs, cjavai. Inte seconde al veve scuvierzût che lis formis si completavin. A jerin lizeris e ingravidis, ma lis sintive come alc in  plui che liniis jenfri la fumate, travanade dai prims rais di soreli. Pe tierce Sierade (mai al veve podût impensâsi parcè a no sucedeve il rest dal an), dute la imagjin si veve comedade come un puzzle. A si visave che intal moment imediât ae disparizion de fumate  si componeve un cuadri di  soldâts e indians, di sclopis e lancis puartadis in bataie.

Cun la praticitât di om di campagne al veve sielzût di pensà che la sô imagjinazion e les ator inte fumate e e liberàs un ninin la sô anime zovine, prime di passâ dute la zornade sgjavant agârs paris e compagns, par chestis cjamps cuasi vergjins di chei gnûfs confins, concuistâts za cuarante agns indaûr. Al si veve convinçût di jessi stât inspirât di contis scoltadis jenfri fogarons e sgnapis. O in cualchi flabe contade di sô mari de epoche dai atacs indianis.

Par la cuarte Sierade al veve decidût di bati la sô imagjinazion e i ricuarts. E la miôr forme di fâlu e jere di lâ cuintri lis formis da la fumate. A dimostrâsi che no jerin spirts di indians che a impugnavin lancis, ni cjariis di cjavalarie di frontiere, ni cuarps agonizants intal cjamp di bataie.

Si veve svicinât cul tratôr a dut ce che al podeve. Si  jere sbassât e al jere jentrât cun lentece. Al contrari di ce che al prossumave, a man a man che al leve dentri lis formis a si fasevin plui concretis. Al veve viodût formâsi ator di lui dislocazions di atac e difese, lancis jentradis te cjâr, lamps inte bocje dai fusii,  proietilis che a sclopavin tai cuarps. Al veve olmât in rivoc lis urladis, il scuintrâsi des filis, la minime sivilade de cjâr taiade. Al tacave a complasêsi pe sô imagjinazion cuant che al veve sintût i siei pîts infondâsi e si e cjatât a pestâ pantan insanganât. Spaurît, a veve cirût di tornâ indaûr.

Intal albe de dì dopo il capuçat a olme il tratôr fumant, cul motôr ancjemò impiât. Al tache a cjaminâ cun pas strac dal altri estrem dal cjamp. A mancjaressin cent metris cuant che al crôt di viodi Batist slargjât a muse insù cul pet traviersât par une cane taiade in ponte che si jeve de tiere. Al cordongje. Ma cuant che al rive al viôt nome une cane maglade di sanc.

Batist nol è stât mai cjatât, si pues nome imagjinâlu inte fumate come une figure che si slontane manovrant un tratôr, juste al confin de tiere arade.

di Zorz Cesaratto
#1105