Gjai

Dilunc de zornade al vanze cualchi minût par butâ il voli ae television, no ch’al sedi tant di viodi, ma cul meti a puest l’argagn che le pie e sbrisse  fûr la imagjn. Lis figuris che a comparissin dispès ti fasin dî: «Ma di dolà saltino fûr chei lì?!»
A lis voltis a son propit chei che nus comandin, no simpri par fortune. In particolâr, ind è un che si presente simpri cui cjavei sgjalinâts e pensâ che al comande une part di cheste tiere un grun impuartante,  che e à tignût a scorie di chê pocje di puare int par fâ reonâ i fats siei e cumò il siò rapresentant si fâs viodi propit ta chei stats li. Ogni volte che lu olmi mi ven tal cjâf il gjal che e veve  Catine.
Jê e veve il miôr pulinâr dal paîs: gjalinis bielis che te cove i pojavin di chei pôcs di ûfs… une maravee. Nancje la murie no jere rivade fin li, che jê il siò pulinâr lu disinfetave cu la cinise. E diseve che il merit lu veve ancje il gjal, un bocon di mostro: creste rosse e drete, plumis slusintis, al tigneve adun lis  gjalinis de prime ae ultime e a saltavin fûr di chês clocjis di lusso, parfin di podê vendi.
Po al rivâ chel moment dal an che Catine, come simpri, si metè a spirâ i ûfs par metîju in côf. Cuant che il soreli al fo alt tal cîl e tirà dongje in sfese lis dôs antis de puarte de cusine e cjapant un ûf par volte lu meteve cuintri lûs par viodi se il gjal al veve morosât cu le gjaline; se sì, al jere just di cove. Ma chel an, al saltâ fûr che plui di tre cuarts  da i ûfs no jerin juscj, plui di cualchi gjaline no veve morosât, no jere mai sucedude une tâl robe! Po, cun chê sorte di gjal che e veve!
Par dî il vêr no veve fat câs di nuie, e cualchi volte e veve cjatât tantis plumis ator pal pulinâr, ma  e pensave che al  fos stât il gjal a splumâ cualche poleç, ch’al cresseve cu la ande di deventâ capo pulinâr. Invezit une matine e cjatà il gjàl dut scrodeât e li sgjalinis e lis clocjis indiauladis. A jerin lôr ch’e lu splumavin! Par bonâ la robe e dovè domandâ un gjal d’imprest, tocje rimarcâ però, che se nol fos stât pal  rabalton che a vevin inmaneât lis clocjis e lis gjalinis, chel an no sarès nassût nissun poleçut. Cussì, come ogni volte che al è alc che a nol va, i ultins a inacuarzisi a son propit chei di sore, che a varessin vût di vuadeâ dut. Pe cronache il gjal al restà a zirâ a vueit ancjemò par un pôc di timp, dopo e rivà une fieste comandade e pe ocasion i tirarin il cuel. Cussì cuant che o viôt cualchi siorut che al zuje a fâ il capo e che al à i cjavei sgjalinats, o masse petenâts, mi domandi se al sa ch’a baste pôc  a cjapâ una bune scrodeade o se no, a fâ la fin dal gjal di Catine!

di Marisa Gregoris
#1103