Puars gnotui

No varès mai crodût che i gnotui a fossin rivâts a fâ tant scjas par chêl che al stâ sucedint cumò, ven a stâi burî fûr un virus ch’a al fâs inmalâ e murî tante int, une robone!

A nô ch’o vin une cjame di carnevâi sù pe schene, i gnotui nus puartin indaûr tai agns, cuant che il prin cjalt ju sburtave fûr a svualâ te bielis gnotoladis d’Istât, che nus scjaldavin fin te meole dai vues. Il lôr svualâ bas al è simpri restât un misteri par ducj. No ju vin mai viodûts a poiâsi su cualchi ramaç e se a fermavin il svual a lavin a taponâsi ta un ceson o sepi Diu dulâ; par dî la veretât nus fasevin ancje un pôc di sgrisui!

A nô frutis nus disevin di stâ atentis par vie che se a brincavin une biele gjavelade a vevin cûr di peâsi intor cirint di gjavânus i cjavei, massime dopo sunade l’ore di gnot; cussì noaltris si tiravin sul puarton dongje cjase. Plui tart però a varessin capît che nus disevin chest par che no stessin ator pe place.

Cumò invezit a disin che chel virus trement che nus fâs tribulâ al è stât sparniçât dai gnotui, ma se ju vin vûts sul nestri cjâf par agnoruns d’Istât e no nus è capitât nuie cemût podino crodi a une tâl? Lis malatiis brutis a capitavin par solit l’Unvier.

Sarai malfidante, ma mi pâr che chei che a disin chest a stan tignint i voi in sfese! Se a fos chi mê none a disares di sigûr: – A son baronadis grandis, di balonîrs!

di Marisa Gregoris
#1082

1 coments On Puars gnotui

  • Biele le conte di Marisa a ripuartâ ricuarts lontans, cul sô biel scrivi a fa rivivi bielis peraulis beromai smenteadis, e in fin incolpâ chês puaris besteutis che fin îr no a àn mai disturbât, e à reson le puare none “baronadis di grancj balonîrs” Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît