L’aiâr di cumò

E jè une gjonde sintî il telegjiornâl che, a cualsisei ore, ti conte prime di dut cemût che e va indenant la pandemie ch’o vin, po’ trope int che a àn brincât, e par sierâ in glorie il numar di chei che a son lâts di chê altre bande! Par fâti il cûr content a ti contin di trop che a àn dât par judâ chei, che par vie de COVID a son restâts a pît, par no dî cul cûl par tiere, rivuart al lavôr, però al è di dî che ju tegnin in moto cul vierç-e-siere e ju ten in sfese. Cui jutoris, di ce ch’e si rive a capî, a dovaressin jessî rivâts beçons par cuvierzi il dan e, chei che ju àn cjapâts, siorons. Ma a sintî chei puars dal vierç-e-siere, pôc e nuie la uniche robe sigure par cumò e je che le àn tal comedon!
Però al è di rimarcâ che plui di cualchidun, ta un timp cussì grivi, al è stât bulo; a son chei che si son impegnâts a fâ rivâ lis mascarutis, pe protezion nestre, pe opere plui che pie che a àn fat a àn cjapât un grum di “indenizzi’. Si sa che i vûl mistîr par fâ ben lis robis e, se ta l’impegn tu zontis ancje il cûr, il vuadagn al devente dopli.
Mi sint di dâ un consei a chei ch’a son restâts cu lis mans vueidis: -Fantats parait vie la avilizion, gambiait mistîr, butâjisi sù lis MASCARUTIS!

di Marisa Gregoris
#1084