Il cont e l’omenut

Fat al stâ che un Cont si jere smenteât di paiâ la bolete da lûs e al riscjave che i gjavassin la corint in curt, forsit in zornade.
La sô cjasade e jere colade in disgracie, lui nol veve mai lavorât e al veve scugnût liberâsi dal maiordom e di une massarie che no jere nancje cuissà ce.
E nol varès mai crodût di metisi propite lui, il Cont a spietâ la coriere, par lâ in pueste a paiâ la sô dismenteance. Intrics che prime al disberdeave il so maiordom, o pûr la massarie cence che lui si preocupàs.
Ma corieris no passavin.
Fintremai che al veve viodût rivâ dongje un omenut suntune biciclete scancarade, il cjapiel sbusât e la gjachete fruiade. Un slambri insom i bregons al bateve su la cjadene, piturantsi di svuirç a ogni pedalade.
— Omenut! Che si fermi!
E chel si jere fermât.
— O ai premure di paiâ cheste bolete! Podaressial lâ lui in pueste, stant che al à la biciclete?
— In altris ocasions o varès ancje fat chest plasè, ma a son che mi spietin in ostarie e jo o soi il cuart di une briscule!
A sintî chês peraulis, al Cont si montave la fote. Mai nissun al veve disubidît a un so comant.
— Ma saial lui cui che o soi? — Si jere stiçât il Cont, intant che chel altri al smontave de biciclete.
— No sai, ma cjalant il so aspiet, no sbaliarès a considerâlu un sioron.
— Brâf. E invezit la sô someance mi puarte a viodilu come un puar diaul. Eco parcè che nô siôrs o stin in alt e voaltris puars i steis in bas.
— Su chest al à reson! — Al veve dit l’omenut. — Par di plui, lui al è parsore il marcjepît, che di sigûr lu tire sù di nivel!
Il timp al passave e il Cont al viodeve che l’omenut al veve il cjâf dûr e nol resonave. La pueste a varès sierât jenfri misdì e lui al sarès restât di bot cence curint.
Bisugnave cambiâ la strategjie.
— Fasin cussì. — Al veve dit cuietantsi Il Cont. — Che mi vendi la sô biciclete e che al ledi a pît inte ostarie. Se al rive in ritart al paiarà un zîr di tais. Se o rivi in ritart jo, o resti cence lûs!
Afâr fat!
E cussì, il Cont al jere partît di corse viers la pueste pedalant a strachis su chê biciclete scloteade.
L’omenut al jere intant partît a pît.
— Jo o sarai ancje un puar diaul, ma di sigûr o sai che di domenie no passin corieris e la pueste e je sierade!

di Massim Furlan
#1078

1 coments On Il cont e l’omenut

  • Un grum di siorons di une volte a àn dovût sporcja i bregons su le cjadene de biciclete cuant che lis robis si stavin comedant pe puare int. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît