I triscj #1

— Al è dome par doi dîs…
— Ma po sigûr, nol è nissun fastidi. No sta vê pinsîrs.
Intant che il confinant i mostre là che i lasse i crostins (un gjenar diferent par ogni dì), il savalonut di cambiâ, i sachets par cjoli sù lis buiacis, Mario al pense dentri di se: — Finalmentri!
E je la ocasion ch’al spietave di timp in ca: i confinants fûr dai voi, ad abadâ a cualchi lavôr di fâ te cjase ch’a àn in Val Pesarine e lui che, une volte par dutis, al pues deliberâsi di chel gjat che i pisse saldo su lis rosis. E no dome i pisse: altri che savalonut e sachetuts! Al è peât a spindi une monede par cambiâ ogni setemane lis rosis secjadis, che sô femine e vûl biel denant di cjase.
E cumò al è dibant pierdi timp. A pene che l’auto dai vicins al volte su la statâl, al è za daûr a scorsenâ il gjat cul sac di jute des patatis, disvuedadis intune cassele. Nissun nol si inacuarzarà di nuie: un gjat discomparît, al sucêt.
Tal viodilu rivâ dongje, la besteute lu smire, e jeve lis orelis; e gnaule cence cjalâlu in muse, come ch’e volês fâi une paterne e po, scuasit cence premure, e sbrisse in cjase traviers la sô buchere te puarte di daûr.
— E vie tu! — si dîs Mario dibot riduçant intant ch’al vierç la puarte grande de cjase cu la clâf che i àn lassade. — Tu ti âs sgjavât il foran di bessole!
Il gjat al è distirât sul sofà te sale. Ve’ ca, cjape! Mario i si bute parsore. Tal varc al ribalte il taulinut bas ch’al è denant: il vâs di rosis parsore si strucje, al va in creps; l’aghe e imbombe il biel tapet. Il gjat al cor bande la puarte ch’e da sul garâs. Al cîr di slungjâsi par rivâ su la mantie ma Mario al partîs di buride, sigûr di vêlu aromai tal sac cuant che s’inçopede intun mac di clâfs ch’a vevin di jessi stadis sul taulin: al tresse e cence rivâ a ripiâsi al cole cuintri la vetrine in bande. La puartele di veri e va in creps, e cul colp ancje il riplan di parsore si ribalte e une sdrume di tacis e plats si sbridinin par tiere.
Ta chel tirepare nol si à inacuart che la puarte grande si je vierte. — E sarà grivie jentrâ in cjase cence lis clâfs par… — al fâs il confinant, fermant a bot di fevelâ.

di Gianluca Franco
#1072