Filosofie di vons

O vevi cinc agns cuant che mi soi visât che la muart nus rive a ducj. Chel toc di rivelazion al jere rivât slacât tal jet, biel cjalant un libri di pipins. Par il barcon e rivave la ultime luminositât di une sere di Sierade. O soi lât te cucine, mê mari e jere daûr a preparâ di cene.
– Mame parcè la int e mûr?
– E je leç da la vite fi. Dut ce che al nas al rivarà il dî che al mûr.
O ricuardi la rispueste cu l’arome da la cevole taçade.
– Ma, ducj, ducj, ducj o vin di murî?
– Sì, e je cussì, ma a te ti mancje une vore ancjemò, no stâ a pensâ.
– Ma alore infin, finalmentri, jo o varai di crepâ!
– Si, ma ti torni a dì, ti mancje une vore.
– Ma – jo o ai dit , cun lis primis lagrimis saltant sù e i voi cjalantle fis – al finâl ducj a murin!
O soi tornât di corse tal jet, a vaî cul cjâf insot dal cussin.

Al jere passât cualchi minût, e ancjemò vaint o ai sintût la vôs da gno von. Lui al jere a stâ a trê stradis di li e cuasi dutis lis seris al passave par cjase nestre. Lu sintivi cisicâ cun mê mari. Daspò al è vignût a viodimi.

– Mandi. Ce âstu?
– Jo mi soi inacuart che ducj a murin. Mame, tu, jo, e ducj nô e ducj tal mont o passarin a murì.
– Ah sì! Propit cussì – mi dîs une vore trancuil, come se al fevelàsi di chestis robis ducj i dîs.
– Ma parcè o vin di murì? – o domandavi tal mieç di lagrimis e sanglotadis in chel che o o crôt, al è stât il prim ingôs da mê vite.
– Parcè che se la int no murarès, il mont al sarès cussì plen – al à rispuindût fasintmi viodi une man cu lis pontis dai dêts metudis adun – e a no podaressin nancje movisi.
– Ah, sì che je juste! – o ai dit, calmât al moment. E mi soi indurmidît in pâs.

di Zorz Cesaratto
#1069