Contis di pandemie – Laurinç

Dut al nassè come contor di un rumôr, che al fo cjapant la forme di un colôr indefinît, rivant a trasformâsi intun zâl che si convertì in notizie. Come un lizêr aiarin si fo introdusint tes orelis de int, che al sintîle ur faseve vignî ogni pêl un pan. E cussì al fo che, zigzetant, la micje impiade e rivà ae bombe che detonà provocant un davoi: e jere rivade la pandemie. Daspò di cetantis oris di avion, Laurinç al jere rivât in chel paîs poiât cuasi li che al finive il mont. Il motîf al jere partecipâ aes gnocis di un so cusin e ancje cognossi il rest de cjasade, che di agnorums e veve emigrât in chel sît di grandis estensions di tiere, di besteam e di grancj flums, ai antipots des lôr origjinis furlanis. La famee e jere unevore grande e  sparniçade ca e là. A dî il vêr la rivade di Laurinç, che al vignive di un paîs dulà che la pandemie si jere instalade da timp, ju metè in bocje di ducj, e no savevin dulà scuindilu. Finalmentri a deciderin mandâlu li di un barbe che al viveve lontan de grande citât. Al bastave che cualchidun di chê localitât al cjapàs cognossince de rivade di chest om, che la novitât e leve di cjase in cjase. Joisus! Puar Laurinç di bot si cjatà a brene vierte sot dal public judizi. Plui adore che tart i cjâfs des fameis dal puest si riunivin cun la autoritât locâl par cjapâ misuris igjienichis e altris, cualchi estreme decision e meteve pôre, pal fat che une situazion come cheste no ju lassave resonâ, stant che a savevin ben pôc di chest malan e che l’unic gjornâl dal puest nol fevelave masse di chê pandemie: curts e secondaris articuluts a vignivin metûts sù te ultime pagjine, nomenant sôl cualchi câs sucedût oltran, ma nuie altri. Al improvîs lis pocjis farmaciis de zone a scomençarin a vendi alcui in gjel e tai magazens varechine, la int, in gjenerâl e iniziave a rispietâ la distance sociâl cun tant di mascarute. I preparatîfs des gnocis a jerin bielzà rivâts ae spice, al mancjave dome il tant suspirât sì dai nuviçs. Purtrop pal moment a restarin in spiete di un timp plui oportun. Puar Laurinç, te valîs si jere puartât daûr un bregonut curt, une cjamese vivarose, sandui di corean, e ocjai di soreli. Magari cussì no, nol à mai vût la oportunitât di metisi in biele mostre.

di Galliano di Buenos Aires
#1061

1 coments On Contis di pandemie – Laurinç

  • Biele le conte di Galiano, pal fat che tocjie cantins sui recents acjadiments e di serie situazion. Cheste pandemie a à rot i programps di dute le umanitât, infiltrantsi intun mût cussi vîl, rindint dificil e dolorôs il saltà fûr. Propit cumò che lis nazions cu le globalizazion scomençavin a cgnossisi miôr, cresint amicizie e voie di judasi, purtrop le pandemie no intint che sedi cussi, rompint i programps di ogni gjenar e di ogni bande. Simpri biel lei Galiano che oltri le sostance des contis, al sà metilis ju cun chel furlan cussi ben poiât e ric di peraulis raris indulà al è dut ce imparà. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît