Cju di Umil

O soi devant di chescj mûrs frêts e cuvierts di jerbe, che in altri timp a forin cjasis cun i fogolârs cjalts e fumants.
Mi figuri, mi impensi cemût che e jere la vite in chescj timps cuant che i frutats di dutis lis fameis a zuiavin contents tal viert da pîts de mont e lis feminis a lavin cul zei a cirî lis jerbis, parcè che a mangjin lis vacjis e lis pioris tal Invier, lis gjalinis che a sgjarpedin tal prât, la fontanute che e riceveve la aghe frescje dal piçul riûl, i lidrics e lis bledis tal ort. Cuant che i oms a lavin a vore fûr paîs par masse timp e come che al diseve gno nono “si lave a vore in Gjermanie”.
Mi imagjini chel paîs cence soreli cu la ombrene che e scomence de Sierade e e finìs a Fevrâr cul Invier masse frêt e la nêf che si disfe cuant che e rive la Vierte e dut al è in flôr.
In chest piçul borc dongje Salet al è nassût gno nono bis Costantino, il gno nono Gio Bata e ancje gno pari.
Si clamave Cju di Umil o Chiout Degli Uomini come il cognon di dutis lis fameis che a son stadis culì. Parcè che cuant che i zovins si son maridâts, lis feminis a lavin a stâ ae cjase de famee dal om.
Vuê dome a son lis cjasis sdrumadis cence int, ducj a son lâts vie, prin pe emigrazion dopo pes dôs vueris, daspò pal taramot dal 1976. Almancul a restin lis ruvinis: mûrs frêts, ma plens di storie cjalde che mi vuelin fevelâ.

Cristina degli Uomini
#1062

3 coments On Cju di Umil

  • Une conte cun tant sintiment intôr, cuant si cjatisi di front di une cjase bandonade, e darocade,dentri nô e nas une maluserie misteriose, forsit e stin cjalant il percôrs de nestre vite, cu le tiere che prin o dopo e torne a tirà dut a se.Cristina biel il contignût de to conte, speri di leiti ancjemo. Lussian

    • Cristina Luisa Degli Uomini

      Graciis Lussian! Al è un sintiment che mi à dismovût la bisugne di imparâ la lenghe ,la storie dal Friûl e ancje chê di mê famee. Mandi di cûr!

  • Cristina se tu âs voie di imparà le lenghe continue in contecurte, jo chel tic che le sai, lei e cjacarà, le ai imparade dute culì, e stant cjase. E dopo no je dome le lenghe, ma i fats des contis leats alle nestre biele tiere, indulà si pô scuvierzi antighis usançis e tradizions. Mandi, mandi. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît