Kaspersky

Cuant che Bertin al ven a russâsi cul nono, di sigûr al vûl molzi alc.
“Nono Bortul, cemût stâstu?” al tache il rufian.
Bortul al à bielzà nasât che i tocje vierzi il tacuin.
“Vonde ben!” al rispuint Bortul cence dâi masse cuarde al nevôt, che no lu mole un moment.
“Mi prestistu cincuante euros?” al tache il frut, cuntune bocje di ridi che no tu puedis dîsi di no.
“Ce âstu di fâ cun lôr Bertin?” al domande il vecjo, sigûr che ancje cheste volte il prestit lu segnarà su la glace.
“Mi è jentrât un virus tal computer e si no i met dentri l’antivirus Kaspersky  no pues doprâlu.” al fâs Bertin cun muse rote.
“Orpo!” al fâs Bortul, “Costie cussì cjare cheste medisine? Poben o vevi juste di lâ in farmacie a cjoli lis pirulis pa pression e tu vegnis cun me”.
“Nono, cheste medisine no si cjate in farmacie!” al dîs Bertin, pensant che il nono al sedi simpri plui rincojonît.
”E indulà lu compristu chest Casp… Casp… o ce dal ostie che si clame?” al fâs Bortul che a otantevot agns al è restât un pôc indaûr. “Lu compri su Ibei e in doi dîs mi lu puartin a cjase!” al rispuint Bertin.
Bortul nol capìs plui di tant, e di robis modernis po nancje un fregul. “Ce raze di non di dâi a cheste buteghe!” al pense il vecjo, tirant fûr il tacuin.
Po si zire viers il nevôt, che al balinave denant di lui cun la man vierte. “Ma cemût aial cjapât il virus il to argagn?” al sbroche Bortul, slungjant a Bertin i cincuante euros. “No i vevistu metût la mascarine?”

di Pauli Jacuz
#1042