Il balon

In chê dì la partide e jere za ben inviade cuant che jo, a pene rivât, no ti viodio, di stant ancjemò su la stradele, chel simbinît di un balon traviersâ la strade e rivâ saltuçant fin dongje de cjadreute di nono Gjelin, il teribil nono Gjelin! E devant dai voi o ai za la sene seguitive: il vieli al brinche il balon, in man i comparis la britule e zac, zac! Dôs vuarvelis sul corean e adiu partide par vuê e par cuissà fin cuant, cui lu cjatie un altri balon?
No li, sturnît di un stupidat di un balon! No sâstu tancj tiei fradis che a àn vude lassade la sghirbe sot de britule di nono Gjelin! Tropis mai partidis lassadis a mieç, va vie di li, balonat, Danêl dulà sêstu?

Nono Gjelin al jere a stâ juste in rimpet dal cjamp di balon e si sentave su la sô cjadreute in bande de sô puarte di cjase e nus cjalave zuiâ. Atents di no tirâ di chês bandis di là, che par là il balon al riscjave une fin precoce. Danêl al jere il plui brâf a zuiâ di balon, veloç che nissun nol rivave a stâi daûr, dome lui al jere rivât adore a salvâ il balon, tantis voltis, in extremis, juste prime che la britule e fases la sô maledete vore.

Ma in chê dì al jere in ritart! E vie nô, balon sbregât, partide finide! Che il balon al è za li che al va a sbati propi cuintri il picôl de cjadreute! Ah no, no, no la britule, us prei Signorut! Ma nono Gjelin al è za che al slungje un braç, velu!…Ma…ma il balon i scjampe, alore al ponte lis mans sui zenoi par tirâsi sù, ma… nol rive. Nol rive a jevâsi. Al plombe jù in sinton su la cjadreute e il balon al è li a no plui di doi metris, al è cussì dongje, ma aromai cussì lontan par lui. E la britule e reste inutile inte sachete.

Coventavino i milions di peraulis letis in miars di libris, coventavino filosofie, psicologjie, epistemologjie, ermeneutiche par capî ce puare robe che al è l’om?!
A pene nassût, za al scomence a murî, fin che al rive il moment che nol è plui bon di jevâsi sù di une cjadreute?

In chê dì la partide, aromai che o savevin il balon par simpri fûr di pericul, e je durade fin scûr.

di Laurin Zuan Nardin
#1034
Conte tirade dongje di Vôs de Basse 2020

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît