Come bestiis


Zorç si sveà cu la fiere, e la robe no i displasè. Cu la scuse dai mateçs dal so cuarp al sarès restât cjase a polsâ – altri che furlan lavoradôr! Al varès fat gulizion cun Dani e il frut, par une volte, invezit di scjampâ vie svelt. Al pensà ae gnot pene passade: a un ciert pont Dani e veve tacât a strussâ cuintri de sô spale cu la sô biele cjavelade scure, po i veve domandât di russâle daûr des orelis… e lui lu veve fat, ancjemò sturnît dal sium. Ce strane domande, al riduçà Zorç tra se. Si sintì il çarneli: cjalt. Dani e jere jevade, al veve sintût la olme frescje dal so cuarp che al mancjave sot dal bleon. Gjoldintsi la lentece dai soi moviments Zorç al le in cusine.

“Bundì amôr, o ai la fiere e stoi cjase”
“Ah! Beat tu! La âstu basse?” i veve domandât jê, fasint dutis lis mossis de gulizion – jemple di aghe il cit/metilu sul fûc/prepare il tè/cjôl il bussulot dal cafè e la sedonute par jemplâ la moca – cu la sô gracie naturâl, di gjate.
In chel al rivà Marc, pîts strissinâts e muse rabiose: si jere sveât mâl.
“Bundì Marc!”
“M-m”.
I trê a faserin gulizion, becotant i cornflakes e tabaiantsi pôc, ancjemò cjaminant pai coridôrs segrêts des lor scjatis cranichis. Marc al rompè il cidinôr dome par dî: “Bon, alore par ricreazion mi puarti i biscots!”.
E al tacà a cjapâ sù une gocciola daspò di chê altre metintsalis in bocje dutis, cence gloti, fin a jemplâsi i smursiei, che ae fin a jerin compagns di sachetis plenis, che taronditâts di frut. Dani e riduçà, cui siei voi verts-cuasi-zâi, lecantsi la man cun elegance e disint: “Ti sêstu lavât la muse, almancul?”
“Jo o torni tal jet, che no soi just”, al rugnà Zorç, “si viodin a gustâ”.
Tal jet, sgrisulât dal frêt, al si pierdè a cjalâ fûr dal barcon.
La zornade e jere grise in maniere dispietade. Al varès plot. Su la strade cinc personis a spietavin la coriere, capotut-cjapielut-scarputis, tant che pipins. No jerin sot de tieze de fermade, come par solit, ma a stavin un dongje di chel altri su la linie blancje dal ôr de strade, fers. A rivarin altris dôs personis e si meterin ancje lôr dongje, a formâ une rie ancjemò plui lungje. Passaris sul cabli de curint.
Zorç si indurmidì, come se cualchidun al ves fracât un boton distudant bot e sclop la realtât, lis robis cemût che a son, la sigurece di ce che si tocje.
Si sveà dome a ore di gustâ, sintint la puarte che e sbateve e i passuts di Marc. Al viodè che su Telegram i jere rivât un messaç video dal gnuf titolâr, che i tignive une vore aes comunicazions smart. Cun orôr, Zorç si rindè cont che si jere dismenteât di visâlu de fiere! Al fasè play sul messaç e al viodè il dott. Maseri, golarine di manager e ocjâi di cuar, che i diseve “Taffaro, è mancato senza avvisare. Non so come foste abituati prima del mio arrivo, ma le cose con me cambieranno! E lei non è nella posizione di prendere le cose sotto gamba!”. Il messaç si sierave cun Maseri, il titolâr plui odeôs e odeât dal mont, che i mostrave i dincj uçâts, di lôf.
“Rogant, cjastron, simiot che no tu ses altri!” al vosà Zorç, batinsi i puins sul pet pelôs.
Ciertis voltis i oms si compuartin come bestiis.

di Margarite Cogôi
#1036
Conte gjavade fûr di Vôs de Basse 2020

1 coments On Come bestiis

  • Ce tante veretât, no je fiere che tegni pai parons di vuê, e ti pain subit cul dit ” la di fûr son cent di lôr che a àn voie di vignî a vore culì”

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît