Zâl par Furlan – 8ve Edizion

I timps a son chei che a son, e se za si fâs fature a mandâ indenant lis iniziativis che a sburtin la lenghe furlane tal normâl, ancjemò plui merit bisugne dâ a chei cjaviestris che a no molin e a tegnin bot in di di vuê.
Un di chescj al è il Comun di Spilimberc (cu la poie di ARLeF, SFF, Istitût Pre Checo Placerean e la USF) cul concors Zâl par Furlan, che lant di doi in doi, al è rivât a sierâ – îr di sere li dal Teatri Miot – la sô otave edizion dal Concors e a fâ la premiazion, spostade di cheste Vierte.
Un concors che al tire dongje contis curtis di gjenar zâl, o dal sotgjenar noir, scritis par furlan e che in gracie di une partecipazion di rive jù al spint sedi pai premis, sedi pe publicazion periodiche des oparis, sedi par une serade di Gale, cun ospits e preparazion. Insome… tant di cjapiel e soredut, par Chei di Contecurte, un pont di riferiment e une iniziative di tignî cont.
Ve chi alore che o vin gust di contâus cemût che e je lade la serade di îr, presentade dal otim Claudio Romanzin, che al à fat di presentadôr e letôr, compagnât di un valet perfet (il segretari de jurie Marco Salvadori, che al à curât ancje la part organizative) e il trio Liron-fisarmoniche-ghitare di Emma Montanari, une vore babios e adats a la serade, cul lôr repertori di cjantis popolârs.
A son stâts premiâts i fruts des mediis di San Denêl, cu lis lôr contis curtis, e la sezion Video pes scueli e à viodût un lavôr bielonon che al meteve adun il trailer di CSI Cisterne, dut di gjoldi.
Ma lis contis? I zâi? A jerin, a jerin… Cuasi vincj lavôrs rivâts e 4 finaliscj, cun contun nivel cualitatîf une vore alt, che al à fat discuti une vore la jurie vuidade di Bepi Mariuz, e che al à viodût une classifiche curtissime,
E alore… stant che il nestri ostîr al jere presint e al à documentât dut, ve chi l’esit dal concors!
Un ex-aequo al tierç puest, cu lis contis:

• L’alien di Enrico Maiero
• La britule cul mani di cuar di Diego Navarria

Une conte che e fevele di un sassinament imprevedibil intai paisûts smenteâts parsore Mueç, chê altre che e va indaûr tal 1600 e nus conte di unaltri maçalizi tes barufis fra Cjarlins e Maran. E a chescj doi chi, se nus lein, o varessin ancje un invît di fâi. Diego e Enrico… us spietìn chi in ostarie, cun cualchi conte curte!
Al secont puest, par un nuie, la conte:

• Amâr come la mîl di Gino Marco Pascolini

che di pôc nus à saludât ducj e al à ricevût chest ricnognossiment postum, par une conte une vore divertente e cuntune struture origjinâl, che e viodeve propite come sassin e protagonist nuiemancul che il president de jurie.
E ae fin, il vincidôr, che za le veve smicjade doi agns fa, al è stât propite…
IL NESTRI OSTÎR!
La conte vincidore e jere:

• Murùs di Raffaele Serafini

un toc storic che al tornave indaûr tal 1421, date che e viôt il cjâf di Marc di Murùs, ultin puartebandiere dal stât patriarcjin di Aquilee, taiât par opare dai venezians, cu la acuse infamant di vê dât acet a un falsari di monedis. Ma la storie e je pôc clare e cualchidun al à une gnot sole par indagâ e scuvierzi ce che al è pardabon sucedût a chel ultin sbrendul di resistence furlane, prin di colâ te vuate di Vignesie.
E l’Ostîr nus fâs savê ancje che chest premi al è une vore contecurtic, stant che la ispirazion e il jutori par i detais storics al è rivât di Carli Pup, e lis corezions par une grafie perfete e un lessic vari e no comun a son come par solit de fidade Coghe Fuguline. (E a proposit… viodêt che e sta par rivâ la Conte dal mês e che i doi a son in vore)
E insome… stant che o vin cheste gnove frescje di pache, us lassìn adiriture la fotografie de premiazion, cui scritôrs mascarâts e Eros Cisilin de Arlef, e adiruture trê mascarutis cu la Acuile furlane (blu, rosse e nere) de Friûl point in biele mostre!
E par cui che al vûl o metin ancje il video de leture dal judizi de jurie.
Insome… nus pâr propite une biele gnove!