Il plui siôr dal Imperi

Meni al veve doi fîs: Tite e Catine. Tite al veve une manie fûr dal ordenari pai bêçs: fin di piçul al cirive di cjapânt sù plui che al podeve. No che i coventassin, ma al veve pôre che cuant che i saressin coventâts al sarès restât cence. Tai agns al veve fat sù un biel malcjolt che al divideve fra li miôr bancjis dal bosc. Al cambiave spes bancje parcè che no si fidave dai banchîrs, ma nol voleve che cualchi sbilf i robàs dut.
Une dì il puar Meni al è muart lassant ducj i siei possediments ai fîs. Tite però a nol voleve dividi l’ereditât cun sô sûr, sì che duncje al veve paiât un grup di sbilfs par robâ almancul i bêçs in bancje e vê cussì di dividi dome i terens e la cjase. I sbilfs però a son stâts becâts e il plan di Tite al è lât a rondulis.
Daspò di chel tentatîf, Tite al à tacât a corompi i nodâls parcè che a lu favoredin te division.
Catine, che no jere stupide, si jere inacuarte e chest i faseve mâl. No pai bêçs (Catine a no i tignive), ma pe justizie: nol jere just! Tite a nol viodeve la ore di meti lis mans su la ereditât: ogni dì al jere simpri pi ansiôs e ossessionât. Ogni volte che la puare Catine a cirive di fâlu resonâ, al lave in bestie e Catine a no podeve plui!
Par fortune in chei dîs l’imperadôr Salomon al jere in visite di chês bandis e cussì al veve podût urdî un plan cundut il vilaç! Sì che duncje, al bandìs un concors par scuvierzi cui che al è il plui siôr di dut l’imperi. Vude la gnove Tite nol viodeve la ore di vinci. Cussì al veve tacât a invistî plui che al podeve, cirint di fâ sù bêçs plui che al rivave e di sburtâ il procès pe ereditât.
Ancje se nol veve ancjemò ereditât nuie, al jere rivât a dopleâ il so patrimoni in pôc mancul di trê mês!
Il dì prime dal concors però l’imperadôr al veve cambiât cuntune leç il sisteme dal calcul dal patrimoni passânt dai bêçs ai amîs. Subit daspò che ven a savê Tite si è inrabiât une vore e si è metût a cirî di comprâ amîs, ma par tant che al ves ufiert nissun al voleve jessi so amì: a jerin ducj stâts trufâts di lui e chei pôcs che prime i stavin dongje lu fasevin dome pai bêçs, ma cumò che i bêçs a no contavin plui nuie a jerin lâts vie ancje lôr!
Tite si jere ricjatât bessôl tant che al varès podût vinci il premi “plui puar dal imperi”; se dome a lu vessin fat: a nol jere nissun altri cence amîs!
Cussì Tite al veve capît che cui bêçs al podeve fâ tantis robis, ma che li robis plui impuartantis a no vevin bisugne dai bêçs, anzit a levin miôr cence. I doi fradis a son tornâts amîs come prime e la ereditât e je stade dividude in mût ecui. Tite al à un grum di amîs, vêrs amîs, e ducj a son contents!
A Salomon al è plasût il gnûf sisteme economic tant che a lu à mantignût e al funzione ancjemò in dì di vuê.

di Davide Peressoni
#1031